Suicide News : म्हापशातील ‘त्या’ युवकाचा व्हिसेरा पोलिसांकडे राखीव

Suicide News : म्हापसा, खोर्ली-म्हापसा येथील आत्महत्या केलेल्या १८ वर्षीय युवकाचा शवविच्छेदनानंतर ‘व्हिसेरा’ राखून ठेवण्यात आला असून, म्हापसा पोलिस अधिक तपास करीत आहेत.

या व्हिसेराचा अहवाल आल्यानंतरच मृत्यूचे अचूक कारण समजू शकेल. स्वयम नाईक असे मृत युवकाचे नाव आहे. दरम्यान, स्वयमच्या मृत्यूचे कारण अद्याप अस्पष्टच आहे. पोलिसांकडून मृतदेह कुटुंबीयांच्या हवाली करण्यात आला व शुक्रवारी त्याच्यावर अंत्यसंस्कार करण्यात आले.

स्वयमने आपल्या राहत्या घरी आत्महत्या केली होती. ही घटना गुरुवारी (ता.२३) दुपारी ३.३० वा.च्या सुमारास उघडकीस आली होती. हा प्रकार पाहून घरच्यांनी त्याला तातडीने इस्पितळात हलविले. मात्र, डॉक्टरांनी त्याला मृत घोषित केले होते.

स्वयमने सुसाइट नोट लिहून ठेवले असून, आपल्या मृत्यूला घरचे किंवा कुणाला कारणीभूत धरू नये, असे त्यात म्हटल्याचे समजते.

या आत्महत्येमागचे नेमके कारण समजू शकलेले नाही. स्वयम हा महाविद्यालयात पहिल्या वर्षात शिक्षण घेत होता. याशिवाय तो जेईईची तयारी करत होता. कदाचित अभ्यासाच्या तणावाखाली असल्याने त्याने हे टोकाचे पाऊल उचलले असावे, अशी शक्यता आहे.