ई-मेल प्रकरणाबाबत अमित पाटकर यांचा राणेंवर घणाघात

पणजी: नगरनियोजन व वन खात्यासंदर्भात कोणत्याही स्वरूपाच्या तक्रारी असल्यास त्या आपल्या ई-मेलवर पाठवाव्यात या नगरनियोजन व वनमंत्री विश्वजीत राणे यांच्या आवाहनाला काँग्रेसने तीव्र आक्षेप घेतला आहे. गोवा ही कोणाची खासगी मालमत्ता नसून सरकारी कामासाठी खासगी ई-मेल कसे वापरले जाऊ शकतात? असा आरोप काँग्रेसचे प्रदेशाध्यक्ष अमित पाटकर यांनी केला आहे.

(Amit Patkar accuses vishwajeet Rane over e-mail case)

नगरनियोजन खात्याच्या मंत्र्यांनी केलेल्या आवाहनानुसार त्यांच्या खासगी ई-मेलवर पहिल्याच दिवशी 35 तक्रारी आल्याची माहिती राणे यांनी ट्विट करत दिली होती. याबद्दल त्यांनी जनतेने दाखविलेल्या विश्वासाबद्दल धन्यवादही दिले होते. मात्र, आता यावर काँग्रेसने आक्षेप नोंदवत सरकारी कामकाजासाठी खासगी ई-मेल का वापरले जावेत असा सवाल त्यांनी केला आहे.

सरकारी कामकाजाचा आव आणत विश्वजीत राणे हे आपल्या खासगी ई-मेलवर तक्रारी मागवत आहेत हे कायदेशीरदृष्ट्या चूक असून ज्यांना तक्रारी करायच्या आहेत, त्यांनी त्या पोलिसांत करणे आवश्यक आहे. तरच याचा सखोल तपास होऊ शकतो, अन्यथा नाही असेही पाटकर यांनी म्हटले आहे.