ज्येष्ठ नागरिकांसाठी 'गुड न्यूज'! विशेष हेल्पलाईन होणार सुरु; समाज कल्याणचा 'अलंकित’शी करार

Helpline For Senior Citizens By Social Welfare Department

सासष्टी: समाज कल्याण खात्याने ज्येष्ठ नागरिकांसाठी हेल्पलाईन सुरु करण्याचा निर्णय घेतला असून त्यासाठी आज जागतिक ज्येष्ठ नागरिक दिनाचे औचित्य साधून खात्यातर्फे ‘अलंकित’ असाईनमेंट्स लिमिटेड कंपनीशी सामंजस्य करार केला.

या करारावर आज मडगाव रवींद्र भवनात आयोजित कार्यक्रमात खात्याचे संचालक अजित पंचवाडकर व कंपनीचे उपाध्यक्ष संजय भट यांनी स्वाक्षऱ्या केल्या. यावेळी मडगावचे आमदार दिगंबर कामत, समाज कल्याण खात्याचे सचिव ई वल्लवन (आयएएस) उपस्थित होते.

यावेळी १४ ज्येष्ठ नागरिकांचा सत्कारही करण्यात आला. प.बंगाल व लक्षद्वीप वगळता इतर सर्व राज्यांमध्ये ही हेल्पलाईन उपलब्ध असून ४५ दिवसांत किंवा तत्पूर्वी गोव्यातही सुरू केली जाईल,असे कंपनीचे उपाध्यक्ष संजय भट यांनी सांगितले.

आमदार दिगंबर कामत यांनी सांगितले की, ज्येष्ठ नागरिकांकडे दुर्लक्ष करून चालणार नाही. मतदार म्हणूनही ज्येष्ठ नागरिकांची संख्या वाढत आहे. ज्येष्ठांबद्दल तर सर्व समाजाचीही जबाबदारी आहे. त्यांना कुठे ना कुठे गुंतवून ठेवणेही आवश्यक असल्याचे त्यांनी सांगितले.

यावेळी सूर्यकांत नाईक देसाई, इडा रोजमिलर मुखर्जी, चंद्रनाथ धुमे, श्रीपाद गोविंद पालयेकर, रोहिदास हरमलकर, देवकी गावकर, अजित हेगडे, आवेलिनो मास्कारेन्हस, अरविंद वाडीकर, चंद्रकांत दुर्गा माईणकर, माधव केशव प्रभुदेसाई, गीतांजली देसाई, शांताजी नाईक गावकर, शशिकांत केरकर यांचा सत्कार करण्यात आला.