कदंब बस स्थानकांवर तंबाखू उत्पादने विक्रेत्यांवर होणार कारवाई

सासष्टी : कदंब वाहतूक महामंडळाने आपल्या प्रत्येक बसस्थानकांवर ‘तंबाखूवर्ज क्षेत्र’ (नो टोबेको झोन) म्हणून सूचना फलक लावले आहेत. त्यामुळे कुठल्याही कदंबच्या बसस्थानकावर तसेच त्‍या परिसरात तंबाखू उत्पादने विकता येणार नाहीत, तसेच अशी उत्पादने विकत घेता येणार नाहीत.

(Action will be taken against the sellers of tobacco products at Kadamba bus stand in goa)

‘गोवा कॅन’ या ग्राहक फोरमकडून अलीकडेच कदंब महामंडळाला बसस्‍थानकांवर अशा प्रकारचे फलक लावावेत, अशी सूचना करण्‍यात आली होती. जागतिक तंबाखू निर्मूलन दिनानिमित्त गोवा कॅनने अशा आशयाचे सूचनापत्र कंदब महामंडळाला दिले होते व एका महिन्याच्या आत हे फलक लावावे असे त्यात नमूद केले होते.

आता हे फलक पणजीसह मडगाव, कुंकळ्ळी, काणकोण, कुडचडे कदंब बसस्थानकांवर लावले आहेत. मडगाव बसस्‍थानकावर केवळ एकच सूचना फलक लावलेला आहे. हे फलक ठळक अशा दोन-तीन ठिकाणी लावावेत, अशी मागणी होत आहे.

तंबाखू निर्मूलनासाठी आम्ही अनेक उपाययोजना केलेल्या आहेत. सध्‍या आम्ही बसस्‍थानकावर सूचना फलक लावले आहेत. अधूनमधून प्रत्येक बसस्थानकावर आकस्मिक छापे टाकले जातील व कोणी दोषी सापडल्यास त्याच्यावर कडक कारवाई केली जाईल.
- गिरीश गावडे, मडगाव डेपोचे व्यवस्थापक