Bicholim Accident: काळ आला होता पण..! वाठादेव बगलमार्गावर पुन्हा अपघात; पायलट थोडक्यात बचावला

Vathadev Junction Bypass Accident

डिचोली: शहरातील चौपदरी बगलमार्गावरील वाठादेव जंक्शनवर ओम्नी व्हॅनची धडक बसून झालेल्या अपघातात शहरातील एक मोटारसायकल पायलट सुदैवाने बचावला. हा अपघात सायंकाळी सव्वासहा वाजण्याच्या सुमारास घडला. या अपघातात बचावलेल्या पायलटचे नाव भारत असे असून, त्याच्या पायाला तसेच पाठीला मार बसला आहे.

यासंबंधीची माहिती अशी की, डिचोली बसस्टॅण्डवर भाडी मारणारे भारत हे आपल्या (जीए-०४-टी-५४७३) या मोटारसायकलवरून साखळीच्या दिशेने जात होते. बगलमार्गावरील वाठादेव जंक्शनवर पोहचताच समोरून बगलमार्गावर जाण्याच्या प्रयत्नात असताना जीए-०८-एफ-०१३२ या क्रमांकाच्या ओमनी व्हॅनची मोटारसायकलला जोरदार धडक बसली. त्याबरोबर मोटारसायकलसह पायलट भारत हे रस्त्यावर पडले. त्यात ते जखमी झाले.

पायलट रस्त्यावर पडले, त्यावेळी मागाहून वाहन नव्हते. त्यामुळे मोठा अनर्थ टळला. दरम्यान, गेल्या ६ जून रोजी लोकार्पण केल्यानंतर बगलमार्गावर अपघात घडत आहेत. वाठादेव जंक्शनवर दोन मिळून आतापर्यंत बगलमार्गावर दहा अपघात झाले आहेत. दीड महिन्यापूर्वी या जंक्शनवर झालेल्या अपघातात एक दाम्पत्य जखमी झाले होते.