Goa Accident: शिगावात दोन गाड्यांची समोरासमोर धडक; चालक जखमी

शिगाव माटोजे-मेढे येथे आज सकाळी ८-३० च्या सुमारास अग्नीशमन दलाची गाडी व टाटा सुमो यांच्यात समोरासमोर धडक होऊन झालेल्या अपघातात टाटा सुमोमधील चालक फादर थॉमस जखमी तर अग्नीशामक दलातील कंत्राटी कामगार अपघात पाहून भोवळ येऊन पडल्याने त्याच्या डोक्याला किरकोळ जखम झाली. तर फादर थॉमस यांच्या कंबरेला व पायाला इजा झाल्याने त्यांना मडगाव येथील इस्पितळात उपचार सुरू आहेत.

प्राप्त माहितीनुसार शिगाव काऱ्यामळ येथील सुकुर फर्नांडिस यांच्या घरावर रात्री उशीरा आंब्याचे झाड पडले होते. ते हटवण्यासाठी कुडचडे येथून अग्नीशामक दलाचा बंब शिगावमार्गे येत होता, माटोजे मेढे येथील वळणावर बंब पोचला तेव्हा टायर पंक्चर झाला व गाडी दुसऱ्या लेनमध्ये गेली. तेव्हा समोरून आलेल्या सुमोला धडक बसली. सुमो शिगावहून सावर्डे मार्गे जात होती. या धडकेत पिलार फार्म मधील चालक गाडीतच अडकून पडला. जवानांनी त्याला नंतर बाहेर काढले.