Goa Police: राजस्थानमध्ये केली चोरी; गोव्यात येऊन अडकला पोलिसांच्या जाळ्यात

Goa Police: कुख्यात लॉरेन्स बिष्णोई गँगमधील गुंडाला पणजी पोलिसांनी अटक केली आहे. राजस्थानमधील सरदारपुरा येथील पोलिसांसह पणजी पोलिसांनी ही संयुक्त मोहिम राबवली. पवन सोळंकी (वय 32) असे या गुंडाचे नाव असून तो मूळचा मांडोर, जोधपूर, राजस्थान येथील आहे. तो बिष्णोई टोळीमधील सक्रिय सदस्य आहे.

सरदारपुरा येथील एका गुन्ह्यात तो पोलिसांना हवा होता. सरदारपुरामधील गुन्ह्यानंतर तो फरार झाला होता. 04 मार्च रोजी जोधपूरमधील जेसाराम यांच्या घरी त्याने चोरी केली होती. चेहऱ्यावर मास्क लाऊन आणखी एका सहकाऱ्यासह त्याने ही चोरी केली होती.

त्यावेळी त्याने जेसाराम यांना कलेक्शन एजंट असल्याचे भासवत त्यांचे हातपाय बांधून त्यांना मारहाण केली होती. जेसाराम यांचे लाखो रूपये लुटून तो फरार झाला होता. दरम्यान, पणजी पोलिसांनी त्याचा ताबा सरदारपुरा पोलिसांकडे दिला आहे.