Goa AAP: महिलांसाठी ‘आप’चे ‘सुरक्षा ॲप’; सुरक्षा संवाद बैठकीत निर्णय

मडगाव: संपूर्ण देशाबरोबरच गोव्यातील महिलाही सुरक्षित नसून पोलिसही निष्क्रिय झाल्याने महिलांचा या सरकारी सुरक्षा यंत्रणेवरील विश्र्वास उडाला आहे. या परिस्थितीत आम आदमी पक्ष राज्यात स्वतःचे ‘सुरक्षा ॲप’ लाँच करणार आहे, अशी माहिती आपचे बाणावलीचे आमदार व्हेंझी व्हिएगस यांनी दिली.

आपची महिला सुरक्षा संवाद मोहीम आजपासून सुरू झाली असून याच मोहिमेचा एक भाग म्हणून आज बाणावली मतदारसंघात आपच्या महिला आघाडीच्या नेत्यांनी बैठक आयोजित केली होती. त्यात ९ मतदारसंघांतील महिला नेत्यांनी भाग घेतला होता. याच बैठकीतून या सुरक्षा ॲपची कल्पना पुढे आली असून दोन महिन्यांत ते सुरू करण्याची आमची तयारी आहे. या ॲपमधून पिढीत महिलांना तत्काळ सुरक्षा मिळवून देण्याची सोय असेल, असे त्यांनी सांगितले.

महिलांसाठी स्वयं सुरक्षा कार्यक्रम आखून त्याद्वारे संपूर्ण राज्यात प्रशिक्षण कार्यशाळा घेण्याबरोबरच पिढीत महिलांना मोफत कायदेशीर सल्ला आणि इतर मदत देण्यासाठीही एक गट तयार केला जाईल, तसेच शाळांतून विद्यार्थ्यांना मार्गदर्शन करण्याबरोबरच प्रत्येक गावात महिला सुरक्षा समिती स्थापन करण्यासाठीही आम्ही पुढाकार घेऊ, असे व्हिएगस यांनी सांगितले.