भाजप सरकारसाठी इफ्फी बनला फिक्सिंग फेस्टिव्हल

पणजी: आम आदमी पार्टीचे (AAP) उपाध्यक्ष वाल्मिकी नाईक(Valmiki Naik), ताळगाव विधानसभा प्रभारी सेसिल रॉड्रिग्स आणि कार्यकर्त्यांनी बुधवारी आंचिमच्या निविदा प्रक्रियेतील फिक्सिंग झाल्याचा आरोप केला आहे. भाजप सरकारसाठी इफ्फी (IFFI) हा फिक्सिंग फेस्टिव्हल बनला असल्याची टीकाही यावेळी ‘आप’कडून करण्यात आली.

यावेळी ‘आप’चे उपाध्यक्ष वाल्मिकी नाईक म्हणाले, सार्वजनिक बांधकाम खात्याने 70 लाखांच्या बाह्य रंगकामाची निविदा काढली होती. मंगळवारी दुपारी तीन वाजेपर्यंत निविदा सादर करायच्या होत्या. ही निविदा बुधवारी सकाळी 11 वाजता उघडली जाणार होती. सर्वात कमी बोली लावणाऱ्याला ही निविदा दिली जाणार होती. पण निविदा न उघडताच पेंटिंगचे सर्व रंगकाम पूर्ण झाले आहे. इफ्फीची मूळ एजन्सी असलेल्या ईएसजीचे सीईओ, व्हाईस चेअरमन यांना आमची विनंती होती की, या निविदा रद्द करा. त्यांनी बांधकाम खात्याला पत्र लिहून निविदा रद्द करण्याचे आदेश देणे अपेक्षित होते. आश्चर्य म्हणजे ईएसजीचे उपाध्यक्ष, व्यवस्थापकीय संचालक आणि सीईओ यांना इफ्फीची ठिकाणेच माहिती नाहीत.

सीईओ डॉ.तारिक थॉमस यांनी बांधकाम खात्याला पत्र पाठवणार असल्याचे आश्वासन दिले आहे. पण, आम्ही आश्वासनांवर विश्वास ठेवत नाही. आम्ही या प्रकरणी चौकशीची मागणी करत आहोत. 24 तासांत आम्हाला उत्तर हवे आहे. अन्यथा उत्तर मागण्यासाठी मुख्यमंत्र्यांच्या घरासमोर धरणे आंदोलन करू, असे नाईक म्हणाले.

सेसिल रॉड्रिग्स म्हणाल्या, नियम फक्त सामान्य लोकांसाठीच आहेत. सरकार अधिकाराचा बेजबाबदारपणे वापर करत आहे. इफ्फी हा आंतरराष्ट्रीय स्तरावरील उत्सव आहे आणि सरकार त्यातून पैसे कमावत आहे.

आम्ही साबांखाचे अभियंता, ईएसजीचे उपाध्यक्ष, व्यवस्थापकीय संचालक, सीईओ यांना भेटलो. परंतु कोणालाही याची माहिती नाही. या घटनेने माजी राज्यपाल मलिक यांचे राज्य सरकारबाबतचे भ्रष्टाचाराचे विधान सिद्ध होते.

- सुनील सिग्नापूरकर, ‘आप’चे नेते