Accident Death: आंदोलनानंतर गतिरोधकावर रंगकाम करण्याची ग्वाही

Accident Death: धारबांदोडा येथील उपजिल्हाधिकारी कार्यालयासमोरील धोकादायक गतिरोधकामुळे सोमवारी एका तरुणीचा बळी गेल्याने मंगळवारी सकाळी स्थानिकांनी या ठिकाणी ‘रास्ता रोको’ आंदोलन केले.

मात्र, उद्यापर्यंत गतिरोधकाजवळ पथदीप, आवश्यक सूचना फलक तसेच रंगकाम पूर्ण करण्याचे आश्वासन मिळाल्यानंतर आंदोलकांनी तूर्त माघार घेतली. उद्यापर्यंत आश्वासन पूर्ण न झाल्यास गुरुवारी ‘रास्ता रोको’ आंदोलन छेडले जाईल, असा इशाराही दिला. सोमवारी रात्री गतिरोधकावर दुचाकी उसळून झालेल्या अपघातात निफा फर्नांडिस या तरुणीचा मृत्यू झाला होता.

यापूर्वी याच गतिरोधकामुळे अनेक अपघात झाले आहेत. हा गतिरोधक धोकादायक ठरत असल्याचे लक्षात आल्यानंतर तेथे आवश्यक उपाययोजना कराव्यात, अशी मागणी ग्रामस्थ वारंवार करत होते. परंतु, या मागणीकडे प्रशासनाने काणाडोळा केला होता. परिणामी येथे एका तरुणीचा बळी गेला. यामुळे संतापलेल्या लोकांनी सरपंच बालाजी गावस यांच्या नेतृत्वाखाली आज ‘रास्ता रोको’ करण्याचा प्रयत्न केला.