Goa Budget Session 2023: नगराध्यक्ष-नगरसेवकांच्या मानधनात घसघशीत वाढ; अधिसूचना जारी

Goa Budget Session 2023: पालिका प्रशासनाने नगराध्यक्ष तसेच नगरसेवकांच्या मानधनात दुप्पटीने वाढ करून खूशखबर दिली आहे.

हल्लीच झालेल्या अर्थसंकल्पीय अधिवेशनात मुख्यमंत्र्यांनी नगराध्यक्ष व नगरसेवकांच्या मानधनात वाढ करण्याची घोषणा केली होती. पालिकांच्या श्रेणीनुसार नगराध्यक्ष व नगसेवकांच्या मानधनात केलेली वाढ समान आहे.

अ गट नगराध्यक्षांना २५ हजार, ब गट २२ हजार तर क गट नगराध्यक्षांना २० हजारांपर्यंत वाढ केली आहे. पूर्वी हे मानधन गटवारीनुसार पालिकांना अनुक्रमे १२,८२५ रुपये, ११,४७५ रुपये व १०,८०० रुपये असे होते.

आता नगरसेवकांच्या मानधनात सरसकट १८ हजार रुपये वाढवले आहेत. यापूर्वी नगरसेवकांना पालिका श्रेणीनुसार अनुक्रमे १०,८०० रुपये, १०,१२५ रुपये व ९,४५० रुपये मिळत होते.

मुख्यमंत्र्यांनी अर्थसंकल्पात पालिका नगराध्यक्ष व नगरसेवकांच्या मानधनात वाढ करण्याची घोषणा केल्यानंतर पालिका प्रशासनाने ८ जून रोजी गोवा पालिका कायद्याखालील दुरुस्ती मसुदा नियम केले व त्याच्यामुळे ज्यांच्यावर परिणाम होणार आहे, अशा लोकांकडून सूचना व हरकती मागवल्या होत्या.