मुंबईहून गोव्यात आलेली अमली पदार्थ तस्करांची टोळी गजाआड

पेडणे: पेडणे पोलिसांनी (Pedne police) आज केलेल्या कारवाईत मुंबईहून (Mumbai) गोव्यात (Goa) आलेल्या आठजणांची अमली पदार्थ तस्करांची टोळी ताब्यात घेतली. संशयितांकडून 1 लाख 20 हजार रुपये किमतीचे अमली पदार्थ जप्त केले.

पेडणे पोलीस ठाण्याचे निरीक्षक जिवबा दळवी यांनी दिलेल्या माहितीनुसार, अमली पदार्थ तस्करांची एक टोळी मुंबईहून आली असून ती हरमल येथील स्वीट लेक परिसरातील डोंगर भागात अमली पदार्थांची विक्री करत असल्याची खबर त्यांना मिळाली. निरीक्षक जीवबा दळवी यांच्या मार्गदर्शनाखाली काही पोलिसांनी बनावट ग्राहक बनून या टोळीशी संपर्क साधला. त्यांचा ठावठिकाणा लागताच जीवबा दळवी, उपनिरीक्षक प्रफुल्ल गिरी, हरीश वायंगणकर, हवालदार उदय गोसावी, कॉन्स्टेबल अर्जुन कळंगुटकर, स्वप्नील शिरोडकर, विनोद पेडणेकर, भास्कर चारी यांच्या पथकाने एका रिसॉर्टवर छापा टाकला. येथे हे आठ संशयित खोलीत वास्तव्य करून होते. सर्व संशयितांची कसून तपासणी केली असता त्यांच्याकडे विविध प्रकारचे ड्रग्स लपवून ठेवल्याचे आढळले. छाप्यादरम्यान पोलिसांना 800 ग्रॅम गांजा, 340 ग्रॅम चरस, 60 गांजाच्या बिया, एलएसडी आणि इतर कागदपत्रे मिळून आंतरराष्ट्रीय बाजारात 1 लाख 20 हजार रुपये मूल्य असलेले अमली पदार्थ जप्त केले. सर्व संशयितांना अटक केली आहे. पोलीस निरीक्षक जीवबा दळवी यांच्या मार्गदर्शनाखाली पुढील तपास सुरू आहे.

ड्रग्सविक्रीसाठी मुंबईतून गोव्यात

अवघ्या १९ ते २५ वयोगटातील आठ युवक मुंबईहून गोव्यात पर्यटकांना अमली पदार्थांचा पुरवठा करण्यासाठी आले होते. संशयितांची नावे अशी - आलेक्स रोमियो (वय २५, रा. भांडुप, पश्चिम मुंबई), जेफ्री रॉड्रिग्स (वय २४, रा. सह्याद्री नगर भांडुप) सागर संजय जाधव (वय २१, रा.पांडे चाळ भांडुप), एड्रियन किंग्स्टन (वय २१, पटेल चाळ, सेंट अँथनी कॉलनी भांडुप), रोहितजी झेंडे (वय २०, टेंभीपाडा रोड, भांडुप), ऋषिकेश तुकाराम महाडिक (वय २१, टीपी रोड शिवाजी नगर भांडुप), वैभव किसन शिगवान ( वय २१ वर्षे, कांजुर मुंबई), रूपचंद लोंढे (वय १९, टेंभीपाडा रोड, भांडुप).