कॉंग्रेस उमेदवार सुधीर कांदोळकर यांच्याविरुद्ध पोलिसांत गुन्हा दाखल

Goa Election Updates: विधानसभा निवडणुकीच्या पार्श्वभूमीवर सर्वच पक्षांचे उमेदवार जय्यत तयारीला लागले आहे. उमेदवार प्रत्येक मतदारसंघांमध्ये घरोघरी प्रचार करताना दिसत आहेत. निवडणुकीवेळी मतांसाठी जनतेला वेगवेगळ्या प्रकारचे आमिष दाखवले जाते, असे आरोप अनेकांवर करण्यात येतात. अशीच एक घटना काल रात्री (मंगळवारी) कॉंग्रेसचे उमेदवार (Congress candidate) सुधीर कांदोळकर यांच्याबाबतीत घडली आहे.

खोर्ली-म्हापसा येथे लोकांना आमिष दाखवण्याचा प्रयत्न करून आचारसंहितेचे उल्लंघन करण्यात आले आहे. यासंबंधी सुधीर कांदोळकर आणि अज्ञाताविरुद्ध म्हापसा पोलिसांत गुन्हा दाखल झाल्याची माहिती समोर आली आहे. कांदोळकर हे लोकांना आमिष दाखवण्याचा प्रयत्न करत असल्याची विरोधकांनी तक्रार केली. याबाबत दोन्ही बाजूंचे लोक पोलीस स्थानकात दाखल झाले. काल रात्री गंगानगर येथे हा प्रकार घडला. (A case has been registered against Congress candidate Sudhir Kandolkar)

दरम्यान, म्हापशाच्या आमदारपदी निवडून आल्यानंतर दुसऱ्या दिवसापासूनच मी जनहितकारक विकासकामांना चालना देऊन म्हापसा हे गोव्यातील आदर्श शहर बनवणार आहे. त्यापैकी सर्वप्रथम दीर्घ काळ रखडलेला रवींद्र भवनचा (Ravindra Bhavan building) प्रश्न हाती घेतला जाईल, असे काँग्रेसचे उमेदवार सुधीर कांदोळकर यांनी सांगितले होते. पण आता त्यांच्यावर गुन्हा दाखल झाल्यामुळे आणि निवडणुकीसाठी (Goa Assembly Elections 2022) अवघे काहीच दिवस शिल्लक असल्यामुळे याचे पडसाद मतदानावर होणार का, हे पाहणे महत्वाचे असणार आहे.