Margao Accident News: दुचाकीस्वाराच्या धडकेत 75 वर्षीय पादचाऱ्याचा मृत्यू; पुढील तपास सुरू

Margao Accident News: गोव्यातील अपघातांचे सत्र काही केल्या थांबण्याचे नाव घेत नाही. मायणा कुडतरी पोलीस स्थानकाच्या हद्दीतील सां जुझे दि एरियल या ठिकाणी पादचाऱ्याला एका दुचाकीने धडक दिल्या प्रकरणी उपचारादरम्यान त्याचा मृत्यू होण्याचा प्रकार घडला आहे.

माहितीनुसार, मडगावमध्ये सदाशिव खोत (वय 75) हे गृहस्थ रस्त्याने चालले असता, त्यांना दुचाकीची जोरदार धडक बसली. यामध्ये ते गंभीर जखमी झाले. या अपघातानंतर त्यांना दक्षिण गोवा जिल्हा रुग्णालयात दाखल करण्यात आले.

त्यानंतर तिथून त्यांना गोवा मेडिकल कॉलेजमध्ये हलवण्यात आले, मात्र तिथे पोहोचल्यावर त्यांना मृत घोषित करण्यात आले. या अपघातातील दुचाकीस्वार अकबर खान याच्याविरुद्ध मडगाव पोलिसांनी गुन्हा दाखल केला आहे. संबंधित घटनेचा पुढील तपास सुरू आहे.