Fatorda: 13 दिवस उलटले तरी बेपत्ता महिलेचा शोध नाहीच

फातोर्डा: कुंकळ्ळी येथील 59 वर्षीय महिला मागील 13 दिवसापूर्वी मडगाव परिसरातून बेपत्ता झाली. रोला डिसोझा असे नाव असलेल्या या महिलेचा अद्याप शोध लागलेला नाही. मडगाव पोलिसांकडून रोला डिसोझा यांचा (Margao Police) शोध सुरु आहे. शोध लागत नसल्याने डिसोझा यांच्या कुटुंबीयांनी नाराजी व्यक्त केली आहे.

रोला डिसोझा मडगाव येथील ग्रेस चर्च परिसरात 09 सप्टेंबर रोजी सायंकाळी 07 वाजण्याच्या सुमारास शेवटी दृष्टीस पडल्या होत्या. या प्रकरणी त्यांच्या कुटुंबीयांनी मडगाव पोलीस स्थानकात तक्रार दिली.

बेपत्ता महिला तिचा पती जेरी आणि मुलगा क्लाईड यांच्यासह 9 सप्टेंबर रोजी मडगावला गेले होते. जेरी आणि क्लाइड पंप सेट खरेदी करण्यासाठी जात असताना, रोलाने ग्रेस चर्च, मडगाव येथे सोडण्यास सांगितले. रोलाने त्यांना सांगितले होते की ती चर्च मध्ये सामूहिक प्रार्थनेला हजेरी लावेल आणि बसने घरी परतेल. मात्र ती घरी न पोहोचल्याने तिच्या कुटुंबीयांनी नातेवाईक आणि मित्रांना फोन केला, मात्र त्यांचा शोध न लागला नाही. असे कुटुंबीयांनी दाखल केलेल्या तक्रारीत म्हटले आहे.

रोला डिसोझा शेवटी संध्याकाळी सातच्या सुमारास चर्च परिसरात पाहण्यात आल्या, याचे सीसीटीव्ही फुटेजही कुटुंबीयांना मिळाले आहे. मडगाव पोलीस बेपत्ता महिलेचा शोध घेत आहेत अशी माहिती पोलिसांनी दिली आहे .