होळी आणि शिमगोत्सवात वापरण्यासाठी ‘गोवन’ या सरकारच्या प्रक्रिया उद्योगात पाचशे किलो नैसर्गिक रंगाचे उत्पादन यंदा घेतले जाणार आहे, अशी माहिती गोवा जैवविविधता मंडळाचे सदस्य सचिव प्रदीप सरमोकादम यांनी दिली.
पाळी येथे सरकारच्या पुढाकाराने सुरू झालेल्या ‘गोवन’ या ब्रँडचा प्रक्रिया प्रकल्प आहे. तेथे पाचशे किलो नैसर्गिक रंगाचे उत्पादन यंदा केले जाणार आहे. त्याशिवाय राज्यभरातील अनेक महिलांना असे रंग तयार कसे करावेत, याचे मंडळाच्या माध्यमातून प्रशिक्षणही दिले आहे. ज्ञानप्रसारक महाविद्यालयाचे विद्यार्थी यंदाही असे नैसर्गिक रंग तयार करणार आहेत.
नैसर्गिक रंग पुरेसे उपलब्ध होणार नसल्याने काही जणांना रासायनिक रंग यंदा वापरावे लागू शकतात. ज्यांना नैसर्गिक रंग मिळवून वापरणे शक्य आहे, त्यांनी नैसर्गिक रंगच वापरावेत म्हणजे प्रदूषण टाळता येईल तसेच आपले आरोग्यही राखता येईल, असे सरमोकादम यांनी सांगितले.
गेल्या वर्षी ज्ञानप्रसारक महाविद्यालयाच्या विद्यार्थ्यांच्या सहकार्याने हा उपक्रम राबवण्यात आला. फुले, हळद आदींच्या वापरातून नैसर्गिक रंगाची निर्मिती करता येते. हे रंग आरोग्यास हानिकारक नसतात तसेच ते प्रदूषणही करत नाहीत. सर्वांना पुरतील एवढ्या रंगांची निर्मिती आजच्या घडीला करणे शक्य नाही. मात्र, ज्या-ज्या लोकांना असे रंग वापरणे शक्य आहे त्यांनी ते वापरावेत, असे सरमोकादम यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
