Goa Corona Updates: इंग्लंड, शारजाहमधून आलेल्या प्रवाशांपैकी 5 जण कोरोनाबाधित!

Goa Corona Updates: देशात सर्वत्र पुन्हा एकदा कोरोनाचे संकट सर्वांसमोर उभे ठाकले आहे. हळूहळू परिस्थितीचे गांभीर्य लक्षात घेता आता सगळीकडे खबरदारी म्हणून कठोर निर्णय घेण्यात येत आहेत. नुकतेच फ्रान्सने (France) सुद्धा देशात नवे कोविड (Covid) निर्बंध लागू केले आहेत. गोव्यातही नाईट कर्फ्यू लागू व्हावा,असा सल्ला तज्ज्ञ मंडळींनी दिला आहे.

मागील काही दिवसात गोव्यात पहिला ओमिक्रॉनचा (Omicron) रुग्ण आढळला आहे. राज्यात हळूहळू कोरोना बाधितांच्या संख्येत आपल्याला वाढ होताना दिसत आहे. त्यातच आज कोरोनाचे 5 नवे रुग्ण आढळून आले आहेत. इंग्लंडहून आलेल्या 181 प्रवाशांची कोरोना चाचणी (Corona Test) केली असता, त्यातील 4 जण कोरोनाबाधित आढळून आले. तर शारजाहमधून गोव्यात आलेल्या 49 प्रवाशांपैकी एकाला कोरोनाची लागण झाली असल्याचे आढळून आले. असे एकूण 5 प्रवासी कोरोना पॉझिटीव्ह असून पाचही जणांचे नमुने चाचणीसाठी पुण्याला पाठवण्यात आले असल्याची माहिती आरोग्यमंत्री विश्वजित राणे (Vishwajit Rane) यांनी ट्विटद्वारे दिली.