Querim Sattari: अनर्थ टळला! केरी-सत्तरीतील ४५ वर्षे जुनी विहीर कोसळली

Querim Sattari Well Collapsed

वाळपई: दोन माड, केरी-सत्तरी येथे असलेली ४५ वर्षांपूर्वीची विहीर सकाळी अचानक कोसळली. त्‍यामुळे विहिरीच्या बाजूला असलेल्या दुकानातील काही साहित्‍य या विहिरीत पडून नुकसान झाले. दरम्‍यान, ही विनावापर धोकादायक विहीर तातडीने बुजविण्याच्या कामाला सुरूवात झाली आहे. त्यामुळे नागरिकांनी समाधान व्‍यक्त केले आहे.

मिळालेल्‍या माहितीनुसार, दोन माड परिसरात बाजाराच्या मधोमध असलेली ही जुनी सरकारी विहीर पडीक आहे. त्‍यातील पाणी प्रदूषित असल्‍याने लोक त्‍याचा वापर करत नाहीत. आज अचानक ती कोसळली. सदर विहीर बसस्थानकापासून जवळच आहे.

दरम्‍यान, आमदार डॉ. दिव्या राणे यांनी या प्रकाराची दखल घेऊन लोकांना कोणताही त्रास होऊ नये म्‍हणून कोसळलेली सदर विहीर ताबडतोब बुजविण्‍याचा आदेश दिला. त्‍यानुसार काम सुरू झाले आहे.

डॉ. दिव्या राणे, (आमदार, पर्ये)

पर्ये मतदारसंघातील प्रत्येक नागरिकाची समस्या ही माझी समस्‍या आहे. कोसळलेली विहीर धोकादायक होती. त्यामुळे तातडीने उपाययोजना करणे गरजेचे होते. त्यानुसार बांधकाम व जलसिंचन खात्यांच्या साहाय्याने ती कायमची बुजविण्यात येत आहे. लोकांना दुसरी विहीर हवी असल्‍यास त्‍यासाठी प्रयत्‍न करेन.