Anjunem Dam: ९० मीटरची पातळी ओलांडली; ‘वाळवंटी’काठच्या गावांना सतर्कतेचा इशारा

केरीतील अंजुणे धरणाने ९० मीटरची पातळी ओलांडल्याने धरणाचे चारही दरवाजे आज मंगळ. दि. १६ जुलै रोजी सकाळी खुले करून पाणी सोडण्यात आले.

दरम्यान, प्रशासनाने वाळवंटी नदीकाठच्या गावांना सतर्कतेचा इशारा दिला आहे. सध्या धरणाची पातळी ९०.७५ मीटर इतकी आहे. धरणाची एकूण पातळी ९३.२ मीटर आहे. वाळवंटी नदीला भरती, ओहोटी व पावसाचा अंदाज घेऊन पाणी सोडण्यात येत आहे. सध्या ५ सेंटीमीटर दरवाजे खोलण्यात आले आहेत.

गेल्यावर्षी २७ जुलै रोजी धरणाने ९० मीटरची पातळी ओलांडली होती. त्यामुळे त्याचदिवशी धरणाचे दरवाजे उघडून पाणी सोडण्यात आले होते. यावर्षी ११ दिवस अगोदरच धरणाने ९० मीटरची पातळी ओलांडली आहे. धरण क्षेत्रात पावसाचा मारा सुरूच आहे. भविष्यातील पावसाचा अंदाज घेऊन अतिरिक्त पाणी सोडण्यात येते. व धरणाची पातळी संतुलितपणे राखली जाते, असे धरणाचे सहाय्यक अभियंता दिलीप गावकर यांनी सांगितले.