Ranchi: भररस्त्यातून लुटले 35 लाख, दरोडेखोरांची गोव्यात रासलीला; एका चुकीमुळे अडकले पोलिसांच्या जाळ्यात

Ranchi: पैशांनी भरलेली बॅग भररस्त्यातून चोरी केल्याची घटना 11 सप्टेंबर रोजी रांची येथून समोर आली. पंदा बाजार समितीतील व्यावसायिकाने त्याच्या कर्मचाऱ्याकडे 35 लाख रुपये बँकेत जमा करण्यासाठी दिली.

पैशांच्या बॅग घेऊन दरोडेखोर गोव्याला फरार झाले. गोव्यात जाऊन त्यांनी मौजमजा केली आणि तेथून केरळ गाठले.

रांची पोलिसांनी 35 लाखांच्या दरोड्याप्रकरणी श्याम सुंदर जालान, धीरज जालान, हर्ष गुप्ता, सचित साहू, अरुण कुमार आणि सुनील कुमार यांना अटक केली आहे. आरोपींकडून 22 लाख रुपये, सोळा दुचाकी आणि एक कार जप्त करण्यात आली आहे.

एका हिंदी वृत्तपत्राने दिलेल्या वृत्तानुसार, दरोडा टाकल्यानंतर टोळीतील श्याम सुंदरला 20 लाख रुपये देऊन गोव्याला पाठवले. गोव्यात मौजमजा केल्यानंतर सर्व आरोपी केरळला फरार झाले.

तेथून कन्याकुमारीमार्गे बेंगळुरूला पोहोचले आणि त्यानंतर रांचीला गेले. कोणालाही दरोड्याची खबर नाही अशी समजूत दरोडेखोरांची झाली, त्यामुळे ते पुन्हा रांचीला परतले होते.

दरम्यान, आरोपी धीरज जालन सुखदेव नगर परिसरात फिरत असल्याची माहिती पोलिसांना मिळाली. पोलिसांनी सापळा रचून तात्काळ धीरजला अटक केली. त्यानंतर अन्य आरोपींना पकडण्यात आले. या टोळीत आणखी तीन सदस्य असल्याचे पोलिसांचे म्हणणे आहे. फरार आरोपींकडे तीन लाख रुपये आहेत.

या टोळीतील सदस्य फक्त नवीन दुचाकींची चोरी करत होते. रांचीमधून चोरलेल्या बाइक हजारीबाग, गुमला, खुंटी आणि इतर जिल्ह्यांमध्ये विकल्या जात. या टोळीचा अशा 24 घटनांमध्ये सहभाग आहे.