Margao Goa: बापलेक झोपेत असताना काळाचा घाला, छत कोसळून युपीच्या 18 वर्षीय मजुराचा मृत्यू

गोव्यात गेल्या आठ दिवसांपासून मुसळधार पाऊस सुरु असून, पडझडीच्या अनेक घटना घडत आहेत. फातोर्डा येथील ताळसाण झर घराची भिंत आणि छत कोसळून 18 वर्षीय मजुराचा मृत्यू झाला, तर त्याच्या वडील जखमी झाले आहेत. बुधवारी (१७ जुलै) सकाळी साडेसहाच्या सुमारास ही घटना घडली.

कार्तिक चौहान (18, रा. ताळसाण झर, फातोर्डा मूळ उत्तर प्रदेश) असे या घटनेत मृत्यू झालेल्या युवकाचे नाव आहे. तर, दिग्विजय चौहान असे जखमी झालेल्या त्याच्या वडिलांचे नाव आहे.

मिळालेल्या माहितीनुसार, फातोर्डा येथील ताळसाण झर येथील कोमुनिदादच्या जागेवर घर उभारण्यात आले आहे. या घरात कार्तिक आणि दिग्विजय चौहान भाड्याने राहत होते. दरम्यान, सकाळी साडेसहा वाजता घराच्या मागील भिंत कोसळली आणि त्यामुळे घराचे छत देखील खाली आले.

पत्राचे छत खाली आल्याने घरात झोपलेल्या बापलेकाच्या अंगावर ते कोसळले. यात कार्तिक आणि दिग्विजय जखमी झाले. कार्तिक गंभीर जखमी झाल्याने रक्तस्त्राव सुरु झाला. यातच त्याचा मृत्यू झाल्याची माहिती समोर आली आहे.

तर, दिग्विजय यांच्या पायाला जखम झाली आहे. घटनेनंतर स्थानिकांनी घटनास्थळी धाव घेत मदकार्य केले. दरम्यान, मृत कार्तिकचा मृतदेह दक्षिण जिल्हा रुग्णालयाच्या शवागारात ठेवण्यात आला आहे.