वागातोर: उत्तर गोव्यातील वागातोर येथील 'डाउनटाऊन हॉटेल'मध्ये सोमवारी (दि.८) रात्री उशिरा एक दुःखद घटना घडली. या प्रकरणात हॉटेलच्या इमारतीवरून पडून मिदुल मिया नावाच्या १८ वर्षीय कर्मचाऱ्याचा दुर्दैवी मृत्यू झाला आहे.
मृत्यू झालेल्या कर्मचाऱ्याची ओळख मिदुल मिया अशी झाली आहे. तो मूळचा पश्चिम बंगालमधील दक्षिण दिनाजपूर येथील रहिवासी असून गंगापूरचा रहिवासी होता. प्राथमिक माहितीनुसार, मिदुल हा हॉटेलच्या टेरेसवरून (गच्चीवरून) खाली पडला. त्याला गंभीर दुखापती झाल्या. त्याला तात्काळ जवळच्या रुग्णालयात हलवण्यात आले, मात्र औषध काम करत नव्हते आणि काही काळानंतर डॉक्टरांनी त्याला मृत घोषित केले.
मिदुलच्या मृत्यूने हॉटेल व्यवस्थापनात आणि स्थानिकांमध्ये खळबळ माजली आहे. पोलिसांनी या घटनेची गंभीर दखल घेतली असून, मिदुलच्या मृत्यूच्या नेमक्या कारणांचा कसून तपास सुरू आहे. पोलिसांनी या घटनेची तक्रार नोंदवून तपास सुरू केला असून हा अपघात नैसर्गिक होता, मिदुलने आत्महत्या केली की यामागे कोणताही घातपात आहे, या सर्व शक्यता पोलीस पडताळत आहेत.
तपासाचा एक भाग म्हणून हॉटेल परिसरातील सीसीटीव्ही फुटेज तपासले जात आहेत, जेणेकरून घटनेच्या रात्री नेमकं काय घडलं, याचा सुगावा लागू शकतो. सध्या हणजूण पोलीस या प्रकरणाचा सखोल तपास करत आहेत. पीएसआय रमेश आणि पीएसआय साईश शेटगावकर हे या प्रकरणाच्या तपासाचे नेतृत्व करत आहेत. पुढील तपासातून या घटनेमागील सत्य बाहेर येण्याची शक्यता आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.