Verna IDC: दुसऱ्या गोदामात होता 11 टन स्फोटकांचा साठा; ह्युज प्रेसिझेन कंपनीच्या व्यवस्थापन, कर्मचाऱ्यांविरोधात गुन्हा

मडगाव: बेतूल - नाकेरी येथे ह्युज प्रेसिझन कंपनीच्या गोदामात २० मार्च रोजी रात्री स्फोट झाला. यानंतर गोदामाला आग लागली. याप्रकरणी कंपनी व्यवस्थापन आणि कर्मचाऱ्यांविरोधात गुन्हा नोंद करण्यात आला आहे. तसेच पेसाने (पेट्रोलियम व स्फोटके सुरक्षा संघटना) कंपनीचा परवाना रद्द केला आहे.

कंपनीच्या गोदामात झालेल्या स्फोटात १४.५ टन दारुसाठा जळून खाक झाला होता. यात सुमारे सहा कोटी रुपयांचे नुकसान झाल्याचे सांगितले जात आहे. दरम्यान, कंपनीच्या दुसऱ्या गोदामात ११ टन स्फोटकांचा साठा ठेवण्यात आला होता. यासाठी आवश्यक सुरक्षा बाळगण्यात आली नाही, असा आरोप करण्यात येत आहे.

जिल्हाधिकारी आणि पेसाचे अधिकारी यांनी स्फोट झाला त्या घटनास्थळी भेट देऊन दुसऱ्या गोदामातील अवैध स्फोटकांचा साठा सील केला होता. स्फोटके साठवलेल्या ठिकाणी सुरक्षिततेचे आवश्यक उपाय न केल्याने कंपनी विरोधात गुन्हा नोंद करण्यात आला आहे. कुंकळ्ळी पोलिस याप्रकरणी अधिक तपास करत आहेत.