पणजी: 'गोंयचो सायब', संत फ्रान्सिस झेवियर यांच्या शवप्रदर्शन सोहळ्याला देश - विदेशातून लाखो ख्रिस्ती भाविक हजेरी लावणार आहेत. येत्या २१ नोव्हेंबरपासून सुरु होणाऱ्या या सोहळ्यासाठी सरकार जय्यत तयारी करत आहे.
या सोहळ्याला सीमापार पाकिस्तानातून देखील भाविक उपस्थिती लावणार असल्याची माहिती आहे. यासाठी पाकिस्तानातून भारत सरकारकडे अर्ज प्राप्त झाले असून, त्यात शवदर्शन सोहळ्याचे मुख्य कारण नमूद करण्यात आले आहे.
ओल्ड गोव्यातील बॅसिलिका बॉम जिझस चर्चमध्ये संत फ्रान्सिस झेवियर यांचे शव ठेवण्यात आले आहे. याचा शव दर्शन सोहळा येत्या २१ नोव्हेंबर २०२४ ते ०५ जानेवारी २०२५ या काळात होणार आहे. यासाठी सरकार जोरदार तयारी करत आहे.
लाखो भाविक या दर्शन सोहळ्याला हजेरी लावण्याची शक्यता व्यक्त केली जात आहे. पाकिस्तानातून देखील मूळ गोमंतकीय वंशाचे नागरिक या सोहळ्याला हजेरी लावणार आहेत. पाकिस्तानातील शेकडो भाविकांनी यासाठी केंद्र सरकारकडे व्हिसासाठी अर्ज केला आहे. यात भेटीचे कारण संत फ्रान्सिस झेवियर शवदर्शन सोहळ्याचे देण्यात आले आहे.
मिळालेल्या माहितीनुसार केंद्र सरकारने या भाविकांना भारत भेटीची परवानगी दिली असून, गोवा पोलिसांनी प्राप्त अर्जाची छाननी करण्याचे काम केले. भारत पाकिस्तान व्हिसा करार २०१२ अंतर्गत या पाकिस्तानी नागरिकांना भारत भेटीची परवानगी देण्यात आलीय.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.