जोरदार लाटांमुळे होडी उलटली! दहाजणांना जीवनदान, बोट आणि जाळ्‍यांचे मात्र नुकसान

काणकोण: तारीर-राजबाग येथील समुद्रात मासेमारी करून तळपण जेटीजवळ येत असताना मच्छीमारी होडी जोरदार लाटांच्या माऱ्यामुळे उलटली. त्‍यामुळे बोटीवरील दहा खलाशी पाण्‍यात पडले. लागलीच हालचाल करून स्थानिक व जीवरक्षकांनी त्‍या सर्वांना सुखरूप किनाऱ्यावर आणले. त्‍यामुळे मोठा अनर्थ टळला. परंतु बोट आणि त्‍यावरील जाळ्‍यांचे नुकसान झाले.

मासेमारी हंगाम सुरू झाल्‍यापासून समुद्रात कोळंबी तसेच अन्‍य मासळी विपुल प्रमाणात मिळू लागली आहे. त्‍यामुळे अनेक बोटी, ट्रॉलर्स समुद्रात जात आहेत. विशेषत: अजूनही समुद्र शांत झालेला नाही.

५० हजारांची मासळी गेली वाहून

पाटणे येथील दीपक गोपाळ पागी यांची ही बोट सकाळी समुद्रात मासेमारी करून तळपण जेटीजवळ येत असताना राजबाग-तळपण येथील ‘देवाफातर’ येथे जोरदार लाटांच्या माऱ्याने उलटली. या बोटीत सुमारे ५० हजार किमतीची मासळी होती. बोट उलटल्यानंतर मासळी समुद्रात वाहून गेली. जाळ्‍यांचेही नुकसान झाले. खलाशांना वाचविण्‍यास यश आले.