Shreyas Iyer Bullet Throw: भारत आणि न्यूझीलंड यांच्यातील एकदिवसीय मालिकेचा पहिला सामना सध्या बडोद्याच्या मैदानावर रंगला आहे. या सामन्यात भारतीय गोलंदाजांच्या कामगिरीसोबतच टीम इंडियाच्या क्षेत्ररक्षणानेही सर्वांचे लक्ष वेधून घेतले. विशेषतः दुखापतीतून सावरुन मैदानात परतलेल्या श्रेयस अय्यरने आपल्या एका चित्तथरारक 'बुलेट थ्रो'ने न्यूझीलंडचा कर्णधार मायकेल ब्रेसवेलला धावबाद करुन मैदानावर खळबळ उडवून दिली. या रनआउटचा व्हिडिओ आता सोशल मीडियावर तुफान व्हायरल झाला असून अय्यरच्या चपळाईचे सर्वत्र कौतुक होत आहे.
न्यूझीलंडची स्थिती एका वेळी 200 धावांत 5 गडी बाद अशी नाजूक होती. अशा वेळी कर्णधार मायकेल ब्रेसवेल फलंदाजीला आला आणि त्याने डॅरेल मिचेलच्या सोबतीने डाव सावरण्याचा प्रयत्न केला. डावाच्या 43व्या षटकात डॅरेल मिचेलने लॉंग ऑनच्या दिशेने एक फटका मारला. क्षेत्ररक्षण पाहून दोन धावा सहज होतील असा अंदाज कॉमेंटेटर्सनीही वर्तवला होता. ब्रेसवेलने दुसऱ्या रनसाठी धाव घेतली, मात्र तिथे क्षेत्ररक्षण करत असलेल्या श्रेयस अय्यरचे इरादे काही वेगळेच होते.
अय्यरने चेंडू वेगाने उचलला आणि विजेच्या वेगाने (बुलेट थ्रो) नॉन-स्ट्रायकर एंडच्या दिशेने फेकला. ब्रेसवेलने क्रीझमध्ये पोहोचण्यासाठी डायव्ह मारली, पण त्याआधीच चेंडूने स्टंपचा वेध घेतला होता. रिप्लेमध्ये स्पष्ट दिसले की, ब्रेसवेल क्रीझच्या खूप मागे होता. घडलेल्या या प्रकारामुळे ब्रेसवेलला धक्का बसला आणि त्याला स्वस्तात माघारी परतावे लागले.
सुरुवातीला सलामीवीरांनी दिलेल्या धक्क्यातून सावरत आणि मधल्या फळीतील पडझडीनंतरही न्यूझीलंडने 50 षटकांत 8 बाद 300 धावांचा टप्पा गाठला. किवी फलंदाजांनी भारतीय गोलंदाजांचा जिद्दीने सामना केला. आता भारतासमोर विजयासाठी 301 धावांचे मोठे लक्ष्य आहे. बडोद्याची खेळपट्टी फलंदाजांना पूरक मानली जाते, त्यामुळे या धावांचा पाठलाग करताना भारतीय फलंदाजांना सुरुवातीपासूनच आक्रमक खेळावा लागेल.
श्रेयस अय्यरसाठी (Shreyas Iyer) हा सामना खूप महत्त्वाचा आहे. ऑस्ट्रेलियाविरुद्धच्या सिडनी वनडेत त्याला गंभीर दुखापत झाली होती, ज्यामुळे तो तीन महिने क्रिकेटपासून दूर होता. दीर्घ विश्रांती आणि उपचारानंतर अय्यर पुन्हा एकदा 'मेन इन ब्लू' जर्सीमध्ये मैदानात उतरला आहे. क्षेत्ररक्षणात आपली चुणूक दाखवल्यानंतर आता फलंदाजीमध्येही तो आपली ताकद दाखवेल अशी चाहत्यांना आशा आहे. रोहित शर्मा आणि विराट कोहली यांच्यासोबतच मधल्या फळीचा कणा असलेल्या अय्यरच्या बॅटकडे सर्वांच्या नजरा खिळल्या आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.