FC Goa: गोमंतकीय मध्यरक्षक साहिल ताव्होरा पुन्हा एफसी गोवात; आठ वर्षांनंतर ‘घरवापसी’

पणजी: मानोलो मार्केझ यांच्या मार्गदर्शनाखाली हैदराबाद एफसीतर्फे आयएसएल करंडक जिंकलेला २८ वर्षीय गोमंतकीय मध्यरक्षक साहिल ताव्होरा पुन्हा एफसी गोवा संघात परतला आहे.

इंडियन सुपर लीग (आयएसएल) फुटबॉल स्पर्धा सुरू होण्यापूर्वी एफसी गोवाने मध्यरक्षकाशी करार केला. यापूर्वी साहिल एफसी गोवातर्फे २०१६ मधील आयएसएल स्पर्धेत खेळला होता. तेव्हा सहा सामन्यांत दोन गोल नोंदविले होते. चेन्नईयीन एफसीविरुद्ध त्या मोसमातील फातोर्डा येथे त्याने विजयी गोल केला होता.

एफसी गोवा संघात परतण्याविषयी साहिल म्हणाला, की ‘‘आठ वर्षांनंतर पुन्हा एफसी गोवात दाखल होताना मी उत्साहित आहे. माझ्यासाठी ही खऱ्या अर्थाने घरवापसी आहे. संघासाठी लक्ष्य साध्य करताना मी पूर्ण झोकून प्रयत्न करेन. टप्प्याटप्प्याने प्रगतीवर मी विश्वास ठेवतो. एफसी गोवाकडे पुन्हा येण्याचे प्रशिक्षक मानोलो हे सुद्धा एक कारण आहे. सध्या भारतीय फुटबॉलमधील ते एक सर्वोत्तम मार्गदर्शक आहेत. त्यांच्या मार्गदर्शनाखाली फुटबॉलपटू या नात्याने प्रगती कायम राखण्यास इच्छुक आहे.’’

‘आयएसएल’मध्ये विजयी योगदान

मार्केझ प्रशिक्षक असताना हैदराबाद एफसीने २०२१-२२ मध्ये आयएसएल करंडक जिंकला होता. तेव्हा केरळा ब्लास्टर्सविरुद्धच्या अंतिम लढतीत साहिलने महत्त्वपूर्ण योगदान दिले होते. त्याने बरोबरीचा गोल नोंदविल्यामुळे सामन्याचा निकाल पेनल्टी फटक्यांवर लागला व त्यात हैदराबादने बाजी मारली. ब्राझील फुटेबॉल अकादेमिया व गोव्यातील सेझा फुटबॉल अकादमीचा प्रशिक्षणार्थी असलेल्या साहिलने २०१३ साली धेंपो स्पोर्टस क्लबतर्फे व्यावसायिक फुटबॉल कारकिर्दीस सुरवात केली. आयएसएलमध्ये तो हैदराबादव्यतिरिक्त मुंबई सिटी एफसीतर्फेही खेळला आहे.