Professional League 2024: गोवा पोलिसांचा विजयी धडाका! चर्चिल ब्रदर्सवर 3-1 ने मात

Professional Football League Goa 2024 Goa Police Vs Churchill Brothers

पणजी: गोवा पोलिसांनी प्रोफेशनल लीग फुटबॉल स्पर्धेतील धडाकेबाज कामगिरीचे प्रदर्शन कायम राखताना रविवारी चर्चिल ब्रदर्सला ३-१ फरकाने हरविले. रोनाल्डो ऑलिव्हेराच्या दोन गोलमुळे त्यांनी ३-१ फरकाने विजय प्राप्त केला. सामना म्हापसा येथील धुळेर स्टेडियमवर झाला.

रोनाल्डो ऑलिव्हेरा याने दुसऱ्याच मिनिटास गोवा पोलिसांचे गोलखाते उघडले. नंतर १५व्या मिनिटास अथर्व घाडी याच्या गोलमुळे त्यांची आघाडी वाढली. ६८व्या मिनिटास बिजेश्वर सिंग याने चर्चिल ब्रदर्सची पिछाडी एका गोलने कमी केली, मात्र नंतर रोनाल्डोने सामन्यातील वैयक्तिक दुसरा गोल नोंदवत गोवा पोलिसांना स्पर्धेतील सहावा विजय मिळवून दिला.

त्यांचे आता सात लढतीतून १८ गुण झाले असून अव्वल स्थानी असलेल्या स्पोर्टिंग क्लब द गोवा संघाला गाठले आहे. चर्चिल ब्रदर्सचा हा सहावा पराभव ठरला. त्यामुळे सात लढतीनंतर त्यांचे तीन गुण कायम राहिले.