Bandodkar Football Trophy: ओडिशा एफसी सलग तिसऱ्या विजयासह अव्वल स्थानी! चर्चिल ब्रदर्सचा उडवला धुव्वा

पणजी: ओडिशा एफसीने त्यांच्या स्थापनादिनी धडाकेबाज कामगिरी नोंदविताना भाऊसाहेब बांदोडकर मेमोरियल ट्रॉफी फुटबॉल स्पर्धेत चर्चिल ब्रदर्सचा ६-० फरकाने धुव्वा उडविला. फातोर्डा येथील पंडित जवाहरलाल नेहरू स्टेडियमवर शनिवारी झालेल्या लढतीत रॉय कृष्णाने याने शानदार हॅटट्रिक नोंदविली.

ओडिशा एफसीने सलग तिसऱ्या विजयासह ब गटात अव्वल स्थान मिळविले. उपांत्य फेरीत आता त्यांच्यासमोर अ गट उपविजेत्या ब्रिस्बेन रोअर संघाचे आव्हान असेल. चर्चिल ब्रदर्सला सलग तिसऱ्या पराभवाला सामोरे जावे लागले. ओडिशाच्या एकतर्फी विजयात रॉय कृष्णा याने अनुक्रमे २१, ३० व ३६व्या मिनिटास गोल केला. नंतर ४३व्या मिनिटास आफाओबा सिंग याने केलेल्या गोलमुळे विश्रांतीला भुवनेश्वर येथील संघ ४-० फरकाने आघाडीवर होता. अखेरच्या टप्प्यात माविहमिंगथांगा याने अनुक्रमे ८६ व ९०व्या मिनिटास गोल नोंदवून ओडिशाच्या स्पर्धेतील मोठ्या विजयावर शिक्कामोर्तब केले.

डिफेन्सा जस्टिसिया उपांत्य फेरीत

अर्जेंटिनातील क्लब दिपोर्तिव्हो डिफेन्सा जस्टिसियाने चेन्नईयीन एफसीवर २-० फरकाने विजय नोंदविला आणि उपांत्य फेरीत प्रवेश केला. बोहिलर मिर्को व वाल्देझ फ्रान्को यांनी प्रत्येकी एक गोल केला. दुसऱ्या यलो कार्डमुळे उत्तरार्धात दोघांना रेड कार्ड मिळाल्यामुळे डिफेन्सा जस्टिसियाला नऊ खेळाडूंसह खेळावे लागले. दुसऱ्या विजयासह त्यांचे सहा गुण झाले व गटात दुसरा क्रमांक मिळाला. उपांत्य फेरीत ते अ गट विजेत्या एफसी गोवाविरुद्ध खेळतील. चेन्नईयीनचे दुसऱ्या पराभवामुळे तीन गुणांसह आव्हान संपुष्टात आले.