Shubman Gill Record: भारत आणि इंग्लंड यांच्यातील सध्या सुरू असलेल्या कसोटी मालिकेत भारतीय संघाचा कर्णधार शुभमन गिल दमदार फलंदाजी करत आहे. लॉर्ड्स येथे सुरु असलेल्या तिसऱ्या कसोटी सामन्याच्या दुसऱ्या डावात गिल स्वस्तात बाद झाला असला तरी त्याने एक मोठा विक्रम आपल्या नावावर केला आहे. गिल आता इंग्लंडमध्ये एका कसोटी मालिकेत सर्वाधिक धावा करणारा भारतीय फलंदाज बनला आहे.
भारत (India) आणि इंग्लंड यांच्यात खेळल्या जात असलेल्या या कसोटी मालिकेत शुभमन गिलने आतापर्यंत 603 धावा केल्या आहेत. इंग्लंडच्या भूमीवर कोणत्याही भारतीय खेळाडूने कसोटी मालिकेत केलेल्या या सर्वाधिक धावा आहेत. यापूर्वी, 2002 मध्ये राहुल द्रविडने प्रस्थापित केलेला 23 वर्षांचा जुना विक्रम आता गिलने मोडला. या मालिकेत अजून दोन सामने बाकी असल्यामुळे शुभमन गिल आपले हे आकडे आणखी वाढवून नवीन कीर्तिमान प्रस्थापित करण्याची शक्यता आहे.
हा विक्रम यापूर्वी राहुल द्रविडच्या (Rahul Dravid) नावावर होता. 2002 साली भारतीय संघाने इंग्लंडचा दौरा केला असताना राहुल द्रविडने 603 धावा केल्या होत्या. तब्बल 23 वर्षांपर्यंत कोणताही भारतीय खेळाडू द्रविडचा हा विक्रम मोडू शकला नव्हता, पण आता शुभमन गिलने त्याच्या पुढे जाण्यात यश मिळवले आहे.
या यादीत इतर दिग्गज भारतीय फलंदाजांचाही समावेश आहे.
विराट कोहली: 2018 साली भारतीय संघ इंग्लंड दौऱ्यावर असताना विराट कोहली त्याच्या सर्वोत्तम फॉर्ममध्ये होता. त्या मालिकेत त्याने 593 धावा केल्या होत्या. त्याला द्रविडचा विक्रम मोडता आला नसला तरी, कोहलीसाठी ती मालिका अविस्मरणीय ठरली होती.
सुनील गावस्कर: महान फलंदाज सुनील गावस्कर यांचे नावही या यादीत आहे. त्यांनी 1979 मध्ये इंग्लंड दौऱ्यावर असताना 542 धावा केल्या होत्या. राहुल द्रविडने त्यांचाच विक्रम अनेक वर्षांनी मोडला होता, जो आता गिलने मोडला आहे.
राहुल द्रविड: या टॉप-5 च्या यादीत राहुल द्रविडचे नाव दोनदा येते, हे विशेष. 2002 व्यतिरिक्त, 2011 च्या इंग्लंड दौऱ्यातही द्रविडने आपल्या बॅटमधून 461 धावा काढल्या होत्या. यावरून इंग्लंडची भूमी त्याला किती मानवणारी होती हे दिसून येते.
शुभमन गिलच्या या विक्रमी कामगिरीने भारतीय संघाला मोठी मदत मिळाली आहे आणि त्याच्या पुढील खेळीकडे आता सर्वांचे लक्ष लागले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.