KL Rahul Goa Guardians: केएल राहुलची नवी इनिंग! गोवा गार्डियन्स संघाचा बनला सहमालक; प्राईम व्हॉलिबॉल लीगमध्ये पदार्पण

पणजी: भारताचा प्रमुख कसोटी क्रिकेटपटू केएल राहुल आता व्हॉलिबॉल कोर्टवर उतरला आहे. आगामी प्राईम व्हॉलिबॉल लीगमध्ये पदार्पण करणाऱ्या गोवा गार्डियन्स संघाचा सहमालक या नात्याने ३३ वर्षीय शैलीदार फलंदाजाने नवी ‘इनिंग’ सुरू केली.

प्राईम व्हॉलिबॉल लीगचा चौथा मोसम २ ते २६ ऑक्टोबर या कालावधीत खेळला जाईल. ‘‘केवळ समर्थक म्हणून नव्हे, तर सहमालक या नात्याने गोवा गार्डियन्समध्ये सहभागी होणे माझ्यासाठी रोमांचक अनुभव आहे.

व्हॉलिबॉल या खेळाची मी नेहमीच आनंद लुटलेला आहे. देशात या खेळाच्या विकासात योगदान देण्यासाठी मी उत्सुक आहे,’’ अशी प्रतिक्रिया राहुल याने दिली. गोवा गार्डियन्सचे मुख मालक राजू चेकुरी यांनी सहमालक या नात्याने केएल राहुल याचे संघात स्वागत केले आहे.

राज चेकुरी या संघाचे व्यवस्थापकीय संचालक आहेत. संघासाठी सहमालक या नात्याने केएल राहुल योग्य व्यक्ती असल्याचे राज यांनी म्हटले आहे. प्राईम व्हॉलिबॉल लीगचे सीईओ जॉय भट्टाचार्या यांनीही राहुल याच्या व्हॉलिबॉलमधील भागीदारीबद्दल आनंद व्यक्त केला आहे.