ISL 2024-25 FC Goa Vs Mohun Bagan
पणजी: इंडियन सुपर लीग (आयएसएल) फुटबॉल स्पर्धेतील दोन तगडे संघ एफसी गोवा आणि गतवेळचा शिल्ड विजेता कोलकत्यातील मोहन बागान फातोर्डा येथील पंडित जवाहरलाल नेहरू स्टेडियमवर झुंजणार आहे. त्या पार्श्वभूमीवर उभय संघांच्या मुख्य प्रशिक्षकांनी पूर्ण तीन गुणांचेच लक्ष्य जाहीर केले.
सामन्याच्या पूर्वसंध्येला पत्रकार परिषदेत एफसी गोवाचे मुख्य प्रशिक्षक मानोलो मार्केझ यांनी सांगितले, की ‘‘मोहन बागान संघ सध्या प्रशिक्षक होजे मोलिना यांच्या मार्गदर्शनाखाली चांगले फुटबॉल खेळत आहे. त्यांनी संघाचे योग्य व्यवस्थापन केले आहे. हा संघ शिल्डसाठी दावेदार आहे. त्याचवेळी आमचा संघही प्रेरित आहे. एकंदरीत दोन्ही संघांसाठी सामना खडतर असेल. आमची नजर निश्चितच विजयावर केंद्रित आहे.’’
त्यापूर्वी, मोहन बागानचे प्रशिक्षक होजे मोलिना यांनी सांगितले, की ‘‘आमच्या संघात केवळ अकराच नव्हे, तर सारेच खेळाडू चांगले खेळत आहेत. विजय हीच संघाची मानसिकता आहे. आव्हानासाठी आम्ही सज्ज असून शेवटपर्यंत झुंज देऊ.’’
मोहन बागान व एफसी गोवा यांच्यात आयएसएल स्पर्धेच्या गुणतक्त्यात सध्या सात गुणांचा फरक आहे. आठ विजय, दोन बरोबरी व एका पराभवासह मोहन बागानचे ११ सामन्यांतून २६ गुण असून ते अग्रस्थानी आहेत, तर एफसी गोवाने पाच विजय, चार बरोबरी व दोन पराभवांसह ११ सामन्यांतून १९ गुण नोंदविले असून ते सध्या चौथ्या क्रमांकावर आहेत.
मोहन बागान संघ सात विजय व एक बरोबरी मिळून सलग आठ सामने अपराजित असून त्यांनी ओळीने चार विजय नोंदविले आहेत. मागील लढतीत केरळा ब्लास्टर्सला पिछाडीवरून ३-२ असे पराभूत केले होते. एफसी गोवा संघ सहा सामने अपराजित आहे, यामध्ये चार विजय व दोन बरोबरींचा समावेश आहे. अगोदरच्या लढतीत त्यांनी बंगळूर एफसीविरुद्ध २-२ अशी गोलबरोबरी साधली होती.
आयएसएल स्पर्धेतील ८ लढतीत मोहन बागानचे ५, एफसी गोवाचे २ विजय, १ बरोबरी
गतमोसमात (२०२३-२४) कोलकता येथे एफसी गोवा ४-१, तर फातोर्ड्यात मोहन बागान १-० फरकाने विजयी
फातोर्डा येथे मोहन बागानचे ४ सामन्यांत २ विजय, १ पराभव, १ बरोबरी
यंदा फातोर्डा येथे घरच्या मैदानावर एफसी गोवाचे ५ सामन्यांत २ विजय, २ पराभव, १ बरोबरी
यंदा मोहन बागानच्या ६, तर एफसी गोवाच्या ३ क्लीन शीट्स
स्पर्धेत यावेळी मोहन बागानचे २२, तर एफसी गोवाचे २१ गोल
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.