एथन वाझची 'सुवर्ण भरारी'; श्रीलंकेतील राष्ट्रकुल बुद्धिबळ स्पर्धेत जिंकले दुसरे सुवर्णपदक

 Commonwealth Chess Championships 2024

पणजी: गोमंतकीय बुद्धिबळातील ‘वंडर बॉय’ एथन वाझ याने श्रीलंकेत झालेल्या राष्ट्रकुल बुद्धिबळ स्पर्धेत सुवर्णपदक जिंकले. सबज्युनियर (१६ वर्षांखालील) खुल्या गटात तो अव्वल ठरला.

एथनचे हे राष्ट्रकुल बुद्धिबळातील दुसरे सुवर्णपदक आहे. वयाच्या ११ व्या वर्षी त्याने दोन वर्षांपूर्वी १२ वर्षांखालील वयोगटात विजेतेपद पटकावले होते.

यंदा एथन वाझ हा १४ वर्षांखालील वयोगटात खेळण्यास पात्र होता; पण या १३ वर्षीय हरहुन्नरी बुद्धिबळपटूने १६ वर्षांखालील वयोगटात अनुभवी प्रतिस्पर्ध्यांना आव्हान देण्याचे ठरविले आणि त्यात तो सफल ठरला.

वाढदिवसाची छान भेट

तीन सप्टेंबर रोजी एथनने १३ वा वाढदिवस साजरा केला. दोन दिवसांनंतर गुरुवारी त्याने राष्ट्रकुल स्पर्धेत सुवर्णपदक जिंकले. त्याच्यासाठी ही वाढदिवसाची छान भेट ठरली.

गोव्याचा सर्वांत युवा ‘आयएम’

यावर्षी जानेवारीच्या प्रारंभी एथन गोव्याचा बुद्धिबळातील सर्वांत युवा आयएम (इंटरनॅशनल मास्टर) बनला. १२ वर्षे आणि ४ महिन्यांचा असताना त्याने बुडापेस्ट-हंगेरी येथे झालेल्या आंतरराष्ट्रीय स्पर्धेत आयएम किताबासाठी आवश्यक असलेला तिसरा नॉर्म प्राप्त केला. एकंदरित तो गोव्याचा आठवा आयएम बुद्धिबळपटू आहे.