पणजी: अनुभवी सुनंदा येत्रेकर हिच्या शानदार अष्टपैलुत्वामुळे गोव्याने सीनियर महिला टी-२० क्रिकेट स्पर्धेत शनिवारी रोमहर्षक विजय नोंदविला. पावसामुळे प्रत्येकी सहा षटकांचा करण्यात आलेल्या सामन्यात त्यांनी चंडीगडला सात विकेट आणि अखेरचा एक चेंडू राखून हरविले.
एलिट ड गटातील सामना छत्तीसगडमधील रायपूर येथील शहीद वीर नारायण सिंग स्टेडियमवर झाला. गोव्याने नाणेफेक जिंकून चंडीगडला प्रथम फलंदाजीस पाचारण केले. सुनंदाच्या (२-१५) प्रभावी गोलंदाजीमुळे गोव्याने चंडीगडला निर्धारित ६ षटकांत ३ बाद ६२ धावांत रोखले.
सुनंदाने (नाबाद १५) नंतर पूर्वा भाईडकर (नाबाद ८) हिच्या साथीत अखेरच्या षटकात यशस्वीपणे खिंड लढवत गोव्याला स्पर्धेतील दुसरा विजय मिळवून दिला. सुनंदा सामन्याची मानकरी ठरली. यापूर्वी गोव्याने उत्तराखंडला १३ धावांनी हरविले होते, झारखंडविरुद्ध सात विकेटने पराभव पत्करावा लागला होता. गोव्याचे आता तीन लढतीतून आठ गुण झाले आहेत.
संक्षिप्त धावफलक : चंडीगड : ६ षटकांत ३ बाद ६२ (मोनिका पांडे ३०, पारुषी प्रभाकर १६, आराधना बिश्त नाबाद १३, श्रेया परब १-०-१३-०, सुनंदा येत्रेकर २-०-१५-२, तनया नाईक २-०-२२-१, मेताली गवंडर १-०-११-०) पराभूत वि. गोवा : ५.५ षटकांत ३ बाद ६३ (पूर्वजा वेर्लेकर १४, संजुला नाईक १३, हर्षिता यादव ११, पूर्वा भाईडकर नाबाद ८, सुनंदा येत्रेकर नाबाद १५, ज्योती कुमारी २-०-२१-२).
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.