Professional Football League: चर्चिल ब्रदर्सचा स्पर्धेत सलग दुसरा पराभव! साळगावकरच्या मेव्हझेनचा गोल निर्णायक

पणजी: सामन्याच्या दुसऱ्याच मिनिटास मेव्हझेन ऑलिव्हेरा याने नोंदविलेल्या गोलच्या बळावर क्लब द (सीडी) साळगावकर संघाने गोवा प्रोफेशनल लीग फुटबॉल स्पर्धेतील पहिल्या विजयाची नोंद केली. त्यांनी यंदा स्पर्धेत पदार्पण केले असून माजी विजेत्या चर्चिल ब्रदर्सवर रविवारी १-० फरकाने निसटती मात केली.

माजी विजेत्या चर्चिल ब्रदर्सचा हा स्पर्धेतील सलग दुसरा पराभव ठरला. अगोदरच्या लढतीत त्यांना स्पोर्टिंग क्लब द गोवा संघाने नमविले होते. स्पर्धेतील पहिल्या लढतीत जीनो एफसीविरुद्ध बरोबरीचा एक गुण प्राप्त केलेल्या साळगावकरचे आता दोन लढतीतून चार गुण झाले आहेत. सामन्याच्या अखेरच्या टप्प्यात सीडी साळगावकरचा कर्णधार प्रतेश शिरोडकर याला रेफरीप्रती असभ्यता प्रदर्शित केल्याबद्दल थेट रेड कार्ड दाखविण्यात आले, त्यामुळे त्यांचा एक खेळाडू कमी झाला. त्याला लाभ उठविण्याचे जोरदार प्रयत्चर्चिल ब्रदर्सने केले, पण साळगावकर संघाने आघाडी निसटू दिली नाही.

सामना सुरू झाल्यानंतर लगेच सीडी साळगावकरने आक्रमणावर लक्ष केंद्रित केली. सामन्याच्या ४०व्या सेकंदास त्यांना संधी होती, पण साधली गेली नाही. मात्र लगेच डेनिल रिबेलोने तोलूनमापून दिलेल्या क्रॉसपासवर मेझव्हेन याने प्रतिस्पर्धी गोलरक्षक नीतिश मेहरा याने जागा सोडल्याचे अचूक हेरून चेंडूला गोलनेटची दिशा दाखविली. नंतर साळगावकरच्या बोईनाओ सिंग याला संधीचा लाभ घेता आला. शिवाय चर्चिल ब्रदर्सचा बचावपटू अथर्व दांडेकर याची दक्षताही प्रतिस्पर्ध्यांना भारी ठरली.