Satish Shah: सलग 55 एपिसोडमध्ये साकारल्या 55 भूमिका, सतीश शाहांचे निधन; हसऱ्या चेहऱ्याचा पडला पडदा

Satish Shah death: आपल्या चित्रपटांतील आणि मालिकांमधील उपस्थितीने प्रेक्षकांना हसणारे, बॉलिवूडचे सुप्रसिद्ध आणि मनमिळाऊ अभिनेते सतीश शाह यांचे निधन झाले आहे. वयाच्या ७४ व्या वर्षी त्यांनी वांद्रे पूर्व येथील त्यांच्या निवासस्थानी अखेरचा श्वास घेतला. ३० वर्षांहून अधिक काळ सतीश शाह यांचे विश्वासू सहकारी आणि वैयक्तिक सहाय्यक असलेले रमेश कदतला यांनी त्यांच्या निधनाची माहिती दिली.

सतीश शाह यांचे जवळचे मित्र आणि चित्रपटसृष्टीतील सहकारी अशोक पंडित यांनीही त्यांच्या निधनाच्या बातमीला दुजोरा दिला. "हे आपल्या उद्योगासाठी मोठे नुकसान आहे. ते खूप आनंदी स्वभावाचे व्यक्ती होते," असे अशोक पंडित म्हणाले. सतीश शाह यांच्या निधनाने भारतीय मनोरंजन क्षेत्रावर शोककळा पसरली आहे.

अभिनयाचा 'कल्ट क्लासिक' प्रवास

२५ जून १९५१ रोजी जन्मलेले सतीश शाह हे भारतीय चित्रपट आणि दूरदर्शनवरील एक प्रमुख व्यक्तिमत्त्व होते. फिल्म अँड टेलिव्हिजन इन्स्टिट्यूट ऑफ इंडिया (FTII) चे पदवीधर असलेल्या शाह यांनी आपल्या अनेक दशकांच्या कारकिर्दीत उत्कृष्ट विनोदी वेळेसाठी विशेष ओळख निर्माण केली.

सुरुवातीला त्यांनी 'अरविंद देसाई की अजीब दास्तान' (१९७८) आणि 'गमन' (१९७९) सारख्या चित्रपटांमध्ये किरकोळ भूमिका केल्या. मात्र, १९८३ मध्ये आलेल्या कुंदन शाह दिग्दर्शित 'कल्ट क्लासिक' चित्रपट 'जाने भी दो यारों' मुळे ते घराघरात पोहोचले. या भ्रष्टाचारावर आधारित उपहासात्मक विनोदी चित्रपटात त्यांनी भ्रष्ट पालिका आयुक्त 'डी’मेलो'ची संस्मरणीय भूमिका साकारली होती. या चित्रपटात नसीरुद्दीन शाह, ओम पुरी आणि पंकज कपूर यांच्यासारखे नामवंत कलाकार होते.

टीव्ही ते ब्लॉकबस्टर चित्रपट

सतीश शाह यांनी दूरचित्रवाणीवरही जबरदस्त काम केले. 'ये जो है जिंदगी' (१९८४) या मालिकेत त्यांनी ५५ भागांमध्ये ५५ भिन्न पात्रे साकारली होती, ज्यामुळे त्यांची अभिनयाची क्षमता सिद्ध झाली. १९९५ च्या 'फिल्मी चक्कर' मध्येही त्यांनी 'प्रकाश' हे पात्र साकारले.

२००० च्या दशकाच्या सुरुवातीस, ते 'साराभाई वर्सेस साराभाई' या अत्यंत लोकप्रिय सिटकॉममध्ये दिसले. यात त्यांनी रत्ना पाठक शाह, रुपाली गांगुली, सुमीत राघवन आणि राजेश कुमार यांच्यासोबत साराभाई कुटुंबाचे व्यंगात्मक पण प्रेमळ कुटुंबप्रमुख 'इंद्रवदन साराभाई' यांची भूमिका केली. ही मालिका अनेक वर्षांनी बंद पडल्यानंतरही तिचे चाहते कायम राहिले आणि २०१७ मध्ये तिचा दुसरा सिझनही आला होता.

शाह यांनी अनेक यशस्वी मुख्य प्रवाहातील चित्रपटांमध्येही काम केले, ज्यात शाहरुख खानचे 'कभी हाँ कभी ना', 'दिलवाले दुल्हनिया ले जायेंगे', 'मै हूँ ना', 'कल हो ना हो', 'ओम शांती ओम' आणि आमिर खानचे 'फना', 'अकेले हम अकेले तुम' यांचा समावेश आहे. ते डिझायनर मधू शाह यांच्याशी विवाहबद्ध होते. सतीश शाह यांच्या निधनामुळे चित्रपटसृष्टीतील अनेक मान्यवरांनी सोशल मीडियावर शोक व्यक्त केला आहे.