सुदेश मयेकर यांना प्रचारात मिळते प्रेयसी नारुषाची साथ!

कळंगुट: सध्या विधानसभा निवडणुकीच्या (Goa Election) पार्श्वभूमीवर कळंगुटमध्ये विविध पक्षांचे नेते आपापले नशीब आजमावत आहेत, त्यापैकी एक म्हणजे सुदेश मयेकर. कळंगुट (Calangute) पंचायतीचे माजी उपसरपंच तसेच विद्यमान पंच असलेले सुदेश मयेकर आम आदमी पक्षातर्फे कळंगुटमधून निवडणूक लढणार हे निश्चित आहे. दोन महिने जोरदारपणे  चाललेल्या मयेकर यांच्या प्रचारादरम्यान सध्या सर्वांचेच लक्ष वेधून घेत आहे ती त्यांची प्रेयसी नारुषा डिसोझा.

व्यावसायिक कलाकार तसेच मॉडेल असलेल्या नारुषा हिने 2019 साली ‘मिस गोवा’ तसेच ‘रुबारू इंडिया’चा किताब पटकावलेला आहे.  सुदेश मयेकर यांच्या अत्यंत जवळच्या मानल्या जाणाऱ्या नारुषा सध्या मयेकर यांच्या खांद्याला खांदा लावून रात्रंदिवस त्यांच्या प्रचाराची धुरा सांभाळत आहे.

आम आदमी पक्षाची ध्येयधोरणे तसेच महिला वर्गाला पुढे नेण्याचे उद्दिष्ट साध्य करण्यासाठीच आपण मयेकर यांच्या सोबतीने पक्षाच्या विजयासाठी कार्यरत असल्याचे नारुषा हिने दै. ‘गोमन्तक’ला सांगितले. इतकेच नव्हे, तर निवडणुकीतील जय पराजय या गोष्टी बाजूला सारून मयेकर यांच्या वैयक्तिक जीवनात त्यांना शेवटपर्यंत साथ देण्यासाठी आपण बांधील असल्याचे नारुषा हिने सांगितले.