बाबू कवळेकरांना मुख्यमंत्रिपदाची लालसा: सुभाष फळदेसाई

मडगाव: उपमुख्यमंत्री बाबू कवळेकर यांच्या पत्नी सावित्री यांनी सांगेतून अपक्ष निवडणूक लढविल्याने भाजपमधील असंतोष समोर आला आहे. बाबूंनी मुख्यमंत्रिपदाच्या लालसेने आपल्या पत्नीला सांगेत अपक्ष म्हणून उभे केले, असा आरोप सांगेचे माजी आमदार आणि सध्याचे भाजप उमेदवार सुभाष फळदेसाई यांनी केला.

आपली पत्नी आपले ऐकत नाही. आपल्या इच्छेविरुद्ध जाऊन तिने बंडखोरी केली आहे असा खुलासा कवळेकर यांनी केला होता. त्यावर फळदेसाई म्हणाले, हे फक्त दिखाऊपणाचे सोंग आहे. कवळेकर यांनी यापूर्वी आपल्या समर्थकांना आपण मुख्यमंत्री होऊ शकतो आणि आपली पत्नी निवडून आल्यास आपला दावा आणखी मजबूत होईल असे सांगितले होते. याचे माझ्याकडे पुरावे आहेत, असे फळदेसाई म्हणाले.

आपण मुख्यमंत्री झालो तर आपली पत्नी आपल्या मंत्रिमंडळात निश्चितच मंत्री असणार, त्यामुळे केपेबरोबरच सांगेवासीयांचीही कामे होणार, त्यांना सरकारी नोकऱ्या मिळणार अशी आश्वासने कवळेकर यांनी सांगेतील लोकांना दिली आहेत याचीही आपल्याला माहिती मिळालेली आहे. निवडणुकीपूर्वी जर मी बोललो असतो तर त्याचा परिणाम केपेत होऊन भाजपचा एक आमदार कमी झाला असता. त्यामुळेच मी बोललो नाही. आता मतदान झाले आहे. त्यामुळे मी बोलत आहे असे ते म्हणाले.