मडगाव: काँग्रेसमधून आयात नव भाजप आमदारांच्या कार्यकर्त्यांनी पक्षावर कब्जा केल्याने मूळ भाजप कार्यकर्त्यांना दिली जाणारी दुय्यम वागणूक, नोकरभरतीत झालेला अन्याय, अशा अनेक कारणांमुळे गोव्यात मूळ भाजप कार्यकर्ते दुखावले गेले आहेत.शिवाय एकाच घरात दोघांना उमेदवारी दिल्याचा ताप सध्या गोव्याचे प्रभारीपद असलेले महाराष्ट्राचे माजी मुख्यमंत्री देवेंद्र फडणवीस यांना सोसावा लागत आहे. नाराज भाजप कार्यकर्त्यांची समजूत काढताना त्यांना अक्षरशः तारेवरची कसरत करावी लागत आहे.(party workers are given secondary treatment in goa bjp party)
गोव्यात भाजपच्या (Goa BJP) प्रचाराची धुरा सांभाळत असतानाही जुन्या भाजप कार्यकर्त्यांतील असंतोष दूर करण्याची जबादारीही फडवणीस यांनी स्वतःवर घेतली असून ते नाराजांना स्वतः भेटत आहेत. माजी मुख्यमंत्री लक्ष्मीकांत पार्सेकर आणि पर्रीकर पुत्र उत्पल पर्रीकर यांनी भाजप सोडून स्वतंत्रपणे निवडणूक (Goa Assembly Election) लढविण्याचा निर्णय घेतल्यानंतर हे बंडाचे वारे इतर मतदारसंघात पोहोचू नये, यासाठी ते खबरदारी घेत असल्याचे सांगितले जाते.
दोन दिवसांपूर्वी फातर्पा येथे एका सभेत फडवणीस (Devendra Fadanvis) यांना कार्यकर्त्यांच्या रोषाला सामोरे जावे लागले. नोकरभरतीत मूळ भाजप कार्यकर्त्याना डावलले गेले, हा त्यावेळी मांडलेला प्रमुख मुद्दा होता, असे सांगण्यात येते. दक्षिण गोव्यातच त्यांनी एका पंथाच्या धर्मगुरूंची भेट घेतली असता त्यांना असाच अनुभव आल्याची माहिती भाजप सूत्रांनी दिली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
