आमदार अलिना साल्डाना यांचा ‘आप’मध्ये प्रवेश!

Goa Elections: गोव्याच्या राजकारणात रोज नवनवीन घडामोडी घडत असतात. अशीच एक गोष्ट म्हणजे गोव्याचे अपक्ष आमदार रोहन खवंटे यांनी राजीनामा दिल्यानंतर भाजपच्या (BJP) आमदार अलिना साल्डाना (MLA Alina saldhana) यांनी सुद्धा आपला राजीनामा गोवा विधानसभेच्या अध्यक्षांकडे सुपूर्द केला आहे. त्यांनी आज आप (AAP) पक्षात अधिकृतरीत्या प्रवेश केला आहे. हा प्रवेश त्यांनी दिल्लीतून व्हिडिओ कॉन्फरन्सच्या माध्यमातून केला आहे. दिल्लीचे मुख्यमंत्री अरविंद केजरीवाल यांच्या उपस्थितीत ही व्हिडिओ कॉन्फरन्स पार पडली.

पक्षप्रवेश केल्यावर त्यांनी आपले मत व्यक्त केले. त्या म्हणाल्या, "मी राजीनामा दिला कारण दिवंगत माथनी साल्डाना त्या पक्षात सामील झाले होते, आणि त्यांच्या निधनानंतर मी त्यांच्या पाऊलावर पाऊल टाकले, मात्र ती पार्टी आता पूर्वीसारखे राहिलेले नाही. इथे गोव्याच्या जनतेचा विकास होणार नाही हे मला माहीत आहे. कारण पार्टी सर्व तत्त्वे विसरली आहे. आणि त्यामुळेच मी आम आदमी पार्टीमध्ये प्रवेश केला आहे. कारण 'आप' हा असा पक्ष आहे जो महिलांच्या सक्षमीकरणावर भर देत आहे. जो सामान्य माणसांचा पक्ष आहे. दिल्लीचे मुख्यमंत्री अरविंद केजरीवाल (Arvind Kejriwal) यांच्यावर माझा पूर्ण विश्वास आहे. आम्ही आम आदमी पक्षातर्फे महिलांच्या सबलीकरणावर आणि एकंदरीत विकासावर भर देणार आहोत. मला वाटते मी या पक्षात प्रवेश करण्याचा निर्णय अत्यंत योग्य असून मी माझ्या निर्णयापासून खूश आहे."