डिचोली: विधानसभा निवडणूक पार पडल्याने डिचोलीत नेते आणि कार्यकर्त्यांची धावपळ एकदाची थांबली आहे. उमेदवार काहीसे ‘रिलॅक्स’ झाले आहेत. दुसऱ्याबाजूने गेल्या काही दिवसांपासून कार्यकर्ते आणि मतदारांनी सदैव गजबजणारी प्रचार कार्यालयेही आता ‘सुनी-सुनी’ झाली असून, ही कार्यालये बंद झाली आहेत.
आज (मंगळवारी) सकाळी फेरफटका मारला असता, डिचोलीतील बहुतेक सर्व प्रचार कार्यालये बंद असल्याचे दिसून आले. कार्यालयात लावण्यात आलेले बॅनर, झेंडेही दिसून आले नाहीत. काही कार्यालयांनी तर कालपर्यंत तरी काहीच चालू नव्हते, असे चित्र दिसून येत होते.
डिचोली शहरात भाजपसह मगो, काँग्रेस आणि अपक्ष उमेदवारांनी निवडणूक प्रचार कार्यालये उघडली होती. ही प्रचार कार्यालयेही बॅनर, निशाणी आणि झेंडे लावून साजविण्यात आली होती. गेल्या काही दिवसांपासून प्रमुख उमेदवारांच्या प्रचार कार्यालयांनी कार्यकर्ते आणि मतदारांची कायम वर्दळ दिसून येत होती. प्रत्येक कार्यालयांनी चहापानाची व्यवस्था होत होती. सारा काही गडबड, गोंधळ सुरु होता. मात्र मतदान झाले आणि हा गडबड गोंधळ एकदाचा थांबला आहे.
उमेदवारांची धावपळ थांबली
प्रचार, कोपरा बैठका, सभा यामुळे गेल्या काही दिवसांपासून उमेदवारांची धावपळ आणि झोपमोड झाली होती. मतदानाच्या पूर्वरात्रीपर्यंत डिचोलीत प्रमुख उमेदवारांची झोपच गायब झाली होती. मतदानादिवशी पूर्ण दिवस मतदारसंघात फेरफटका आणि रात्री उशिरापर्यंत मतदानाच्या टक्केवारीची गणिते जुळवण्यात उमेदवार व्यस्त होते. मतदान झाल्याने उमेदवार आता काहीसे ‘रिलॅक्स’ झाले असून, त्यांचे लक्ष आता 10 मार्च रोजी व्हावयाच्या मतमोजणीकडे लागले आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
