मूकबधीर वक्तृत्वातून देणार मतदानाचे धडे, निवडणूक आयोगाचा स्तुत्य उपक्रम

भारतातील निवडणुका जगभरातल्या लोकशाही मानणाऱ्या देशांना नेहमीच प्रेरणादायी ठरल्या आहेत. तरीही  काही पक्ष कार्यकर्ते, नेते यांच्याकडून निवडणुकांमध्ये गैरव्यवहार केले जातात. अशांना आयोगाने दणकेही दिले आहेत. निवडणूक प्रक्रियेमध्ये काही त्रुटी आहेत. यात निवडणूक आयोगाने वेळोवेळी सुधारणाही केल्या आहेत.

गोव्यात 2022 मध्ये होणाऱ्या विधानसभा निवडणुकीसाठी (Goa Assembly Election) देशात प्रथमच आगळावेगळा प्रयोग केला जात आहे. राज्यातील दिव्यांग - मूकबधीर मुले वक्तृत्वातून ‘नैतिक मतदान’ या विषयावर बोलणार आहेत. निवडणूक आयोग (Election Commission) कार्यालय आणि संजय स्कूल ऑफ स्पेशल एज्युकेशन यांच्यामार्फत हा उपक्रम बुधवार, 8 डिसेंबर रोजी पर्वरीत होत आहे.

मूकबधिरांना (Deaf Mute) बोलता आणि ऐकताही येते नाही. मात्र, सामान्य माणसाइतकेच ते बुद्धिमान आणि हुशार असतात. आता निवडणूक आयोगाने शक्कल लढवत या मूकबधीर मुलांच्या वक्तृत्व स्पर्धांचे आयोजन केले आहे. अर्थात ही मुले आपल्या साईन कोड भाषेत बोलतील आणि भाषांतरकार ते काय म्हणताहेत ते इतरांना सांगतील. त्यामुळे त्यात रंगत येणार आहे.