काँग्रेसला मोठा झटका! फोंड्यात सदस्यांचा सामूहिक राजीनामा

फोंडा: फोंड्यातील काँग्रेसच्या कार्यकर्त्यांनी आपल्या सदस्यत्वाचा सामूहिक राजीनामा दिला आहे. यावेळेला पक्ष नव्हे तर विकासाला चालना देणारा आणि जनतेच्या समस्या जाणून घेणाऱ्या नेत्याच्या मागे आम्ही खंबीरपणे राहू असे या राजीनामा दिलेल्या काँग्रेसच्या माजी कार्यकर्त्यांनी सांगितले. फोंड्यात काल गुरुवारी यासंबंधीच्या पत्रकार परिषदेला किशोर नाईक, हुसेन मुल्ला, अचला वेरेकर, दिलीप नाईक व बाबा काझी आदी उपस्थित होते. काँग्रेसचे फोंड्यातील अवघे काही नोंदणी झालेले कार्यकर्ते सोडल्यास बहुतांश जणांनी आपल्या काँग्रेस सदस्यत्वाचा राजीनामा दिला. किशोर नाईक म्हणाले की, काँग्रेस पक्षाने गट समिती बरखास्त करताना काँग्रेसच्या कुणालाही विश्‍वासात घेतले नाही, त्यामुळे सर्वांनी सामूहिकरीत्या राजीनामा दिला.

अचला वेरेकर यांनी काँग्रेससाठी (Congress) प्रामाणिकपणे कार्य करूनही कार्यकर्त्यांची संभावना केल्यामुळेच हा राजीनामा दिला असून आता पक्ष नव्हे तर विकासकामे करणाऱ्या व्यक्तीच्या मागे आम्ही राहणार असल्याची ग्वाही दिली. हुसेन मुल्ला यांनीही काँग्रेस पक्षातील बजबजपुरीला कंटाळून सर्वांनी राजीनामा दिल्याचे नमूद केले.