Israel Hamas War: इस्रायलच्या हल्ल्यात हमासचा टॉप कमांडर ठार, मध्य गाझामध्ये लपला होता कुख्यात दहशतवादी!

Israel Hamas War: इस्रायली लष्कराच्या हल्ल्यात हमासचा टॉप कमांडर मारला गेला आहे. इस्रायली संरक्षण दलाने दिलेल्या माहितीनुसार, हमासचा हा सर्वात कुख्यात दहशतवादी मध्य गाझामध्ये मारला गेला आहे.

याआधी हमासचे इतर 6 टॉप कमांडरही मारले गेले आहेत. पण हा कमांडर त्या सर्वांमध्ये सर्वात कुप्रसिद्ध होता. त्याच्या सर्वोच्च कमांडरच्या हत्येला हमासच्या लष्करी शाखेनेच दुजोरा दिला आहे. या हल्ल्यात हिजबुल्लाचे दोन खतरनाक दहशतवादीही ठार झाले आहेत.

हमासच्या (Hamas) लष्करी विंग, कासम ब्रिगेड्सने सांगितले की, मध्य गाझा पट्टीमध्ये इस्रायली हवाई हल्ल्यात त्यांचा एक प्रमुख कमांडर ठार झाला आहे. आयमन नोफेल असे हमासच्या या टॉप कमांडरचे नाव आहे.

गाझा पट्टीवर इस्रायली बॉम्बफेकीत मारला गेलेला तो सर्वात कुख्यात हमासचा दहशतवादी आहे. त्याला अबू मोहम्मद या नावानेही ओळखले जात होते.

अबू मोहम्मद ऊर्फ नोफेल मंगळवारी इस्रायलच्या हल्ल्यात ठार झाला. इस्रायली लष्कराने मध्य गाझा पट्टीतील बुराजी कॅम्पला लक्ष्य केले होते. या हल्ल्यात नोफेलचा खेळ संपला.

यापूर्वीही 6 कमांडर मारले गेले होते

याआधी हमासचे इतर अनेक वरिष्ठ कमांडर इस्रायलच्या हवाई हल्ल्यात मारले गेले आहेत. मुएताज ईदचीही एक दिवस आधी हत्या करण्यात आली होती. 7 ऑक्टोबरच्या हल्ल्यात मुएताज ईदची मोठी भूमिका होती.

इस्त्रायली गुप्तचर यंत्रणा त्याच दिवसापासून यामागे होती. अचूक गुप्तचर माहितीच्या आधारे, इस्रायली हवाई दलाने गाझाच्या दक्षिणेकडील जिल्ह्यात हवाई हल्ला केला आणि मुएताजचा खात्मा केला.

इस्रायलच्या (Israel) या हवाई हल्ल्यात हमासचा लष्करी तळ पूर्णपणे उद्ध्वस्त झाला असून, त्याचा व्हिडिओही जारी करण्यात आला आहे.

आतापर्यंत हमासचे अनेक टॉप कमांडर मारले गेले असून त्यात बिलाल अल केदरा, अली कादी, मुराद अबू मुराद यांची नावे आहेत. गेल्या 24 तासांत इस्रायली सैन्याने हमासची सुमारे 250 ठिकाणे उद्ध्वस्त केली आहेत.