Video: तालिबान्यांनी हेलिकॉप्टरला मृतदेह लटकवून कंधारवर घिरट्या घातल्या

तालिबानने (Taliban) आपला खरा चेहरा दाखवायला सुरुवात केली असल्याचा इशारा देणारे काही दृष्य आता अफगाणिस्तानमध्ये (Afghanistan) पहायला मिळता आहेत. तालिबान्यांनी कंधारमध्ये (Kandhar) अमेरिकेच्या लष्करी हेलिकॉप्टरला एक मृतदेह लटकवून घिरट्या घातल्याचे दिसून आले आहे. हा व्हिडिओ सोशल मिडीयावर व्हायरल झाला आहे. ज्या ट्विटर हॅंडलवरुन हा व्हीडीओ समोर आला, त्या ट्विटर हॅंडलला तालिबान आपले अधिकृत ट्विटर हँडल असल्याचा दावा करते. अनेक पत्रकारांनी हे ट्विट शेअर केले आहे. अमेरिकेने अफगाणिस्तानातून आपले सैन्य पूर्णपणे काढून घेतल्यानंतर हे ट्विट व्हायरल होत आहे. नुकतेच सर्व अमेरिकन सैनिकांनी अफगाणिस्तान सोडले.

'तालिबान टाइम्स' नामक एका ट्विटर हँडलवरुन ही माहिती देण्यात आली आहे. "अफगाणिस्तानच्या इस्लामिक अमिरातीचे अधिकृत इंग्रजी-भाषेतील अकाऊंट" असे या ट्विटरच्या बायोमध्ये लिहीले आहे. या हँडलने दावा केला आहे की हेलिकॉप्टर 'शहरात गस्त घालत आहे. ट्विटमध्ये लिहिले आहे, "आमचे हवाई दल! यावेळी इस्लामिक अमिरातीच्या हवाई दलाचे हेलिकॉप्टर कंधार शहरावर गस्त घालत आहेत. '

रिपब्लिकन सिनेटर टेड क्रुझ यांनी व्हिडिओ शेअर करताना अमेरिकेचे अध्यक्ष जो बिडेन यांना लक्ष्य केले आहे. त्यांनी ट्विट केले, 'अफगाणिस्तानमध्ये बिडेन यांच्यामूळे झालेल्या विध्वंसाचे चित्र दाखवणारे हे भयानक दृष्य आहे.

तालिबानने एका अमेरिकन ब्लॅकहॉक हेलिकॉप्टरमधून एका व्यक्तीला फाशी दिली. ही घटना दुखद आहे’ त्याच वेळी, अनेक ट्विटर युजर्सने हा खरच कोणाचा मृतदेह आहे की, डमी आहे असा प्रश्न उपस्थित केला गेला आहे.