West Bengal : प्रेमासाठी अवैधपणे भारतात घुसली, पण प्रियकराचा तिला नेपाळला विकण्याचा होता प्लॅन

अलिकडेच प्रेमासाठी पाकिस्तानमधून भारतात आलेल्या सीमा हैदर आणि सचिन यांची प्रेमकहाणी संपूर्ण देशाने पाहिली आहे. अशीच एक प्रेमकहाणी पश्चिम बंगालच्या सिलीगुडी येथून समोर आली आहे. पण या प्रेमकहाणीत मोठा ट्विस्ट समोर आला आहे.

प्रेमासाठी बांगलादेशातून सिलीगुडीला आलेली ही 21 वर्षीय मुलगी एका जाळ्यात अडकली. प्रेमासाठी जीव धोक्यात घालून भारतातील आलेल्या या मुलीला प्रियकराचा खरा हेतू लक्षात आल्यानंतर तिने तेथून पळ काढला.

सपला अख्तर ही 21 वर्षीय युवती अडीच महिन्यांपूर्वी बांगलादेशातून अवैधरित्या भारतात दाखल झाली. सिलीगुडीमध्ये तिच्या प्रियकरासोबत ती राहत होती. पण एके दिवशी तरुणीला तिचा प्रियकर नेपाळमध्ये विकण्याचा कट रचत असल्याची माहिती मिळाली.

तरुणीच्या डोक्यातून प्रेमाचे भूत उतरताच ती प्रियकरापासून जीव वाचवून पळून गेली. ती मुलगी ट्रेन पकडण्यासाठी सिलीगुडी रेल्वे जंक्शनवर पोहोचली होती, असे सांगण्यात आले, तेव्हाच एका स्वयंसेवी संस्थेने तिला संशयास्पद स्थितीत फिरताना पाहिले.

सपला अख्तरला संघटनेच्या सदस्यांनी प्रधान नगर पोलीस ठाणे येथील पोलिसांच्या ताब्यात दिले. चौकशीनंतर पोलिसांनी बांगलादेशी तरुणीला बेकायदेशीरपणे भारतात प्रवेश केल्याच्या आरोपाखाली अटक करून गुरुवारी तिला सिलीगुडी न्यायालयात हजर केले.

सिलीगुडी पोलिसांनी युवतीची चौकशी केली असता तिची कहाणी पोलिसांना कळाली व तरुणीच्या प्रियकराचा सर्वत्र शोध सुरू झाला. तरूणीचा प्रियकर अद्याप फरार असून, पोलीस त्याचा शोध घेत आहेत.

सीमा हैदर आणि सचिन

दरम्यान, पाकिस्तानच्या कराचीमध्ये राहणाऱ्या सीमा हैदरची 2020 साली PUBG गेमच्या माध्यमातून ग्रेटर नोएडाच्या सचिनशी मैत्री झाली. त्यानंतर दोघांमध्ये अफेअर सुरू झाले आणि 10 मार्च रोजी दोघेही नेपाळमधील एका हॉटेलमध्ये भेटले. त्यादरम्यान दोघांनीही मंदिरात लग्न केल्याचा दावा सीमाने केला आहे.