रशिया-युक्रेन चर्चा पुन्हा एकदा 'निष्फळ'

किव्ह: रशिया-युक्रेनमधील युद्ध थांबविण्यासाठी शुक्रवारपासून सुरू झालेली चर्चा आज पुढे झाली. मुख्यत्वे युक्रेनमधील मारिउपोलमधील नागरिकांचे रक्षण करण्यासाठी झालेली ही चर्चा निष्फळ ठरली. रशियाच्या तेलसाठ्यांवर युक्रेनने हल्ले केल्याचा दावा युक्रेनने फेटाळला. युद्धात प्रथमच रशियाच्या हवाई हद्दीत युक्रेनची विमाने घुसल्याचे सांगत युद्ध थांबविण्यासंबंधीच्या चर्चेत यामुळे बाधा येऊ शकते, असे रशियाचे प्रवक्ते दिमित्री पेस्कोव्ह म्हणाले.

किव्ह सोडून जात असलेल्या रशियाने राजधानीबाहेर संकट निर्माण करून ठेवले आहे. त्यांनी संपूर्ण भागात भूसुरुंग पेरले आहेत.

चीनचे पर्याय...

युद्ध थांबविण्यासाठी अमेरिकेचे अध्यक्ष ज्यो बायडेन यांनी पुतीन यांच्याशी चर्चा करुन यापुढे ‘नाटो’चा विस्तार करणार नाही, युक्रेनमध्ये सामरिक शस्त्रे तैनात करणार नाही व तटस्थ राहण्याचे आश्‍वासन द्यावे, असा पर्याय चीनच्या राजनैतिक अधिकाऱ्यांनी सुचविला आहे.