"पाकिस्तान तुमचा गुलाम आहे का?" पाश्चिमात्य देशांच्या संयुक्त पत्रावर इम्रान खान भडकले

पाकिस्तानचे पंतप्रधान इम्रान खान यांनी रविवारी इस्लामाबादमधील 22 पाश्चिमात्य राजदूतांना फटकारले, ज्यांनी गेल्या आठवड्यात युक्रेनवरील रशियन हल्ल्याचा निषेध करण्यासाठी पाकिस्तानला विनंती केली होती. रॉयटर्स या वृत्तसंस्थेने दिलेल्या माहितीनुसार, पाश्चात्य देशांच्या राजनैतिक अधिकाऱ्यांच्या विनंतीवर पाकिस्तानचे पंतप्रधान (Imran Khan) रविवारी चांगलेच संतप्त झाले. त्यांनी या देशांच्या राजदूतांना फटकरात विचारले की, पाकिस्तान (Pakistan) तुमचा गुलाम आहे का? (Imran Khan News Updates)

दरम्यान, युरोपियन युनियनच्या (European Union) सदस्य राष्ट्रांसह 22 राजनैतिक मिशनच्या प्रमुखांनी 1 मार्च रोजी संयुक्त पत्र जारी करुन युक्रेनवरील रशियन हल्ल्याचा निषेध करणाऱ्या संयुक्त राष्ट्र महासभेतील ठरावाला पाठिंबा देण्यासाठी पाकिस्तानला आवाहन केले होते. हे पत्र राजनयिक अधिकाऱ्यांनी जाहीरपणे प्रसिद्ध केले. सहसा अशी प्रकरणे क्वचितच दिसतात.

तसेच, रविवारी एका राजकीय सभेला संबोधित करताना, पाकिस्तानचे पंतप्रधान म्हणाले, "तुम्हाला आमच्याबद्दल काय वाटते? आम्ही तुमचे गुलाम आहोत का... तुम्ही म्हणता ते आम्ही करु?"

दुसरीकडे, संयुक्त राष्ट्रांच्या (United Nations) आमसभेत मतदान पार पडले तेव्हा, पाश्चात्य देशांचा पारंपारिक मित्र असलेल्या पाकिस्तानने मतदानात भाग घेण्याचे टाळले. महासभेतील बहुतांश देशांनी रशियाच्या या निर्णयावर टीका करत युक्रेनवरील हल्ल्यांचा निषेध केला.

शिवाय, आपल्या भाषणात इम्रान खान यांनी पाश्चिमात्य देशांच्या राजनैतिक अधिकाऱ्यांनाही विचारले की, 'तुम्ही भारतालाही असेच पत्र लिहिले आहे का? तर भारताने देखील UNSC आणि UNGA मध्ये या विषयावरील मतदानात भाग घेतला नाही.' इम्रान पुढे म्हणाले, ''पाकिस्तानने अफगाणिस्तानमधील नाटो आघाडीला पाठिंबा दिल्याने युक्रेनमुळे त्याचे नुकसान झाले आहे. पाकिस्तान कोणत्याही गटबाजीत गुंतलेला नाही.''