Pakistan Election Results: पाकिस्तानी जनतेने दहशतवादाला नाकारले; हाफिज सईदच्या लेकाचा निवडणुकीत पराभव

Pakistan Election Results:

पाकिस्तानमध्ये निवडणुकीचे निकाल जाहीर होत आहेत. इम्रान खान तुरुंगातूनच नवाझ शरीफ यांच्या पक्षाला टक्कर देत आहेत. इम्रान यांचे उमेदवार अपक्ष म्हणून निवडणूक लढवत आहेत. इम्रान यांच्या पक्षानेही केंद्रात सरकार स्थापनेचा दावा केला आहे. मात्र, पीएमएलएन-नवाज आघाडीवर आहे. दरम्यान, दहशतवादी हाफिज सईदचा (Hafiz Saeed) मुलगा तल्हा सईद लाहोर NA-122 या जागेवरुन निवडणूक पराभूत झाल्याची बातमी आहे. तल्हाला अत्यंत वाईट पराभवाला सामोरे जावे लागले आहे. त्याला केवळ 2042 मते मिळाली आहेत.

दरम्यान, पाकिस्तानचे माजी पंतप्रधान लतीफ खोसा यांनी त्याचा पराभव केला आहे. खोसा हे एक लाखांहून अधिक मतांनी विजयी झाले आहेत. तल्हा सईद हा हाफिज सईदचा उत्तराधिकारी मानला जातो. दहशतीचे साम्राज्य पसरवण्यात तल्हा त्याच्या वडिलांसोबत सामील आहे. भारत सरकारनेही तल्हाला दहशतवादी घोषित केले आहे. भारतात झालेल्या अनेक हल्ल्यांमागे तल्हाचा हात असल्याचं सांगण्यात येत आहे.

दुसरीकडे, दहशतवादासाठी निधी गोळा केल्याप्रकरणी तल्हा सईदचे नावही पुढे आले आहे. पाकिस्तानात (Pakistan) त्याच्या निवडणूक लढवण्यास विरोध झाला होता. मात्र, तल्हाने निवडणूक लढवली. इम्रान खानही याच जागेवरुन निवडणूक लढवणार असल्याचे यापूर्वी सांगितले जात होते. मात्र, न्यायालयाने त्यांना निवडणूक लढवण्यास बंदी घातली. तीन प्रकरणांमध्ये अटक आणि शिक्षा झाल्यामुळे इम्रान खान निवडणूक लढवू शकले नाहीत. नवाझ शरीफ देखील दोन जागांवरुन निवडणूक लढवत होते. त्यांना केवळ एका जागेवर विजय मिळाला आहे.