Pakistan Minister: पाकच्या महिल्या मंत्र्याची भारताला अण्वस्त्र हल्ल्याची धमकी; म्हणे, आमच्याकडील अणुबॉम्ब...

Pakistan Minister: पाकिस्तानचे परराष्ट्र बिलावल भुट्टो यांनी भारताचे पंतप्रधान नरेंद्र मोदी यांच्यावर अत्यंत खालच्या पातळीवरील टीका करून काही तास उलटत नाहीत तोवर आता पाकिस्तानच्या आणखी एका महिला मंत्र्याने प्रक्षोभक वक्तव्य केले आहे. पाकिस्तानमधील या महिला मंत्र्याने भारताला थेट अण्वस्त्र हल्ल्याची धमकी दिली आहे.

पाकिस्तानच्या महिला मंत्री शाझिया मरी (Shazia Marri) यांनी शनिवारी भारताला अण्वस्त्र हल्ल्याची धमकी दिली. बिलावलच्या समर्थनार्थ घेतलेल्या पत्रकार परिषदेत शाजिया म्हणाल्या की, आम्ही शांत बसण्यासाठी अणुबॉम्ब बनवलेला नाही. भारताकडून काही कारवाई झाल्यास त्याला उत्तर दिले जाईल. पाकिस्तानला कसं उत्तर द्यायचं ते माहीत आहे. एक थप्पड मारल्यावर दुसरा गाल समोर करणारा पाकिस्तान हा देश नाही. मी अनेक मंचांवर मोदी सरकारने पाठवलेल्या प्रतिनिधींशी लढले आहे.'

शाझिया म्हणाल्या की, भारतीय मंत्र्याने यूएनमध्ये पाकिस्तान हे दहशतवादाचे केंद्र असल्याचे म्हटले आहे. हा सर्व त्यांचा अपप्रचार आहे. हे फक्त आजचेच नाही. आम्हाला आमच्या देशाविरुद्धच्या चुकीच्या प्रचाराचे षडयंत्र उघड करायचे आहे. आम्ही शांतताप्रिय आणि सभ्य लोक आहोत.

बिलावल भुट्टो यांनी गुरुवारी, ओसामा बिन लादेन मेला आहे, पण गुजरातचा कसाई अजूनही जिवंत आहे, असे वक्तव्य केले होते. त्यानंतर भारतात त्याचे तीव्र पडसाद उमटले होते. दिल्लीतील पाकिस्तानच्या दुतावासाबाहेर भाजप कार्यकर्त्यांनी आंदोलन केले होते, तसेच देशभरात भुट्टो यांच्या प्रतिकात्मक पुतळ्याचे दहन करण्यात आले.